"Siribodo Pef Matax Setan"
        Told by Edes Watemun
        Neat or Liaq
        April 10, 1984

Yako la a ptea-ptea lalen aqa, defo-defo lalen aqa.  A
dohi naq kahate Siribodo.  Naq kahate Siribodo dii:

Da sgeda la nax finhaa,
Bokhena fene, "Bokhena, ku manimpaq io, la kita rua iko, la ma ela nani ina tu
nan ama."

Resek e, nax finhaa, da manimpaq sira rua nun pakeaqor paa du iko la
du ela nunu ina tu nun ama.

Iko sampe du suba kandeax beu-beu la Wasama,
beu-beu la Misrete, da baprepa la nax finhaa fene, "Ku baptea ba nahe, tu a
sali, la a ix keha fua."  Geba naa, riqe naa, todo pena xmalu, mae xmalu,
nhero mae xmalu. Enhero rua mae exmaloro.

Nax finhaa baptea dii, poo riq iko
paa da ix keha fua.  Da iko pa d keha fua, paa da baiko pa lae kira-kira satu
jaam saa gamdita, tu da baprepa la nax finhaa fen, "Iqax tu ku baptea gehan
aq, tu  a bakeha fua brema-breman aqa."

Geda mohede,poo geba todo pena xmalu,
mae exmalu, nhero mae exmalo rua, du kadux dii tu nax fu boti poqon, paa da
baptea di nax finhaa gilin.  Paa geba naa,da lagan-lagan gamdi riq nax gebhaa
dihe.  Poo ana fina naa odo fene iqax tu  nax gebhaa ha na ta.  Paa sira rua
ptea, paa du kaa fua.

Paa baptilo-ptilo sakik e geba todo pena xmalu, mae
exmalu, enhero mae exmalo rua, da oli, da bawadu fu boti poqon.  Pee tu da
basgeix geba snuba leux di dii, fene, "Ka geb sapan ha fixdii, paa ka baptea
fidi ya naq finhaa dii?"

Pee tu geba snuba leux dii,da basade nax roko fene,
"Tu kae nam finhaa naa?"

"Eeh, naq finhaa naa.  Ka geba dii, do ka geb sapan
fidii?  Ka aqax  ya naq finhaa paa ya baneix gos-gosa naa, paa a iko keha fua,
fene ka bene la ka baptea fidi ya naq finhaa!"

Fen, "Moo, ya naq finhaa na
ta."

Sira rua plawan.  Eplawa-plawan, geba mamori naa, enyoli mamori naa, toma
geba snuba leux.  "Moo."

Fen, "Suda.  Kae eplawa xdeme e, iko la m iko gamdi
ya naqu etkoriro, la ma iko di hakim."

Sira rua iko paa du iko di nake
etkoriro, du suba di nagri dii, paa du falex di kapala kampuq, da kalax kampuq
tu saniriro epteax geba rua dii.  Fene fina dii, da urus.  Kapala kampuq
exnikaro, "Ana fina naa, do ka suba naa, do ka touk e geba rua naa, do ka nam
gebhaa ha do?"

Fen, "Aqa ya toux geba rua naa, do geba rua naa laga
mqesa-mqesato naa, kabanar do ya naq gebhaa ha q naa,bu geba ha q naa suba, da
suba tu nax fu boti poqon e, riqe nake todo pena xmalu tu nake enhero mae
exmalo rua naa, lagano gamdi ya naq gebhaa toqi.  Pee tu ya belex laleq, paa a
tewa moo."

Fene, "Gamdii, do coba gebar paha tub haa la geba rua naa cefal,
fen riqe exdoo leu riqe exdoo.  Gamdii, paha tub haa paa geba rua naa cefal."


Du cefal gamahix, geba snuba leux dii, da leu geba nyoli mamori. Jadi geba
snuba leux leu geba ana fina na nake gebhaa dii, bu geba dii, da lalen senaq
tu geba di moo, tu ri nax finhaa.

Geba mqaaro pteax sepu gamdii, belex laleno
sakix tu geba rua naa, fen, "Ix kalax Siribodo.  Ix kalax Siribodo, la
Siribodo, da timbaq perkara na pee, tu kami geba mqaar naa, kam toma ii na
moo."  Fen, "Kalax Siribodo!"

Siribodo suba dii, fene, "Siribodo, kae aqa, kae
epteax geba rua naa nunu perkara na pee, la Siribodo timbaq fene geba rua
naa,do geba ha doo nake finhaa aq naa na."

Fen, "Eeh! Bole, bole, bole!  Ramax
la yako.  Kimi geba mqaaro, ramax la kimi sohix yako."  Fene, "Geba mqaaro,
kalax rayato la du paha tuba pil-pilix la geba rua na cefal peni, la ya toux."


Siribodo,da sgedax geba rua di la du cefal dii.  Da gau nax botol dii, paa da
sgedax geba rua di fen, "Kimi rua cefal!  La sane yaq da rogo ya naq botol naa
qaqan naa, la da pleu ax botol na lalen e, berarti geba ha di ta nax finhaa ha
q naa.  Heta! kimi rua cefal beka!"

Paha tubhaa di paa du cefal, paa du pehex
emhana lakan!  Da pehex-pehex emhana lakan, geba snuba yaq pertama, da rogo di
botol lalen.  Da rogo botol lalen di tu nax todo pena xmalu, mae exmalu, nhero
mae exmalo rua dii, paa da baptane dae lalen!  Da ptane dae lale dii, tu
Siribodo,da tregux botol di qaqan.  Fene, da mqaha la geba mqaar fen, "Geba
mqaar hansiax nagrii lalen na, holun!  Holun, tu setan aki naa!  Geba di ha
filin dii nax finhaa ha q naa!  Ax botol lalen naa, do setan!  Mansia sa te
rogo botol lalen moo.  Setan tem da rogo botol lalen.  Jadi holun! Hansiax
negri taun holun!"  Siribodo dii komando gebaro paa du pepa ban haat, paa du
fagex botol di dae ban haax dii, pa d pola.

Setan di pola sepo, pee tu geba di
eta nax finhaa, paa da bage dii nax beton pito, nax ina tu nax ama seka fafu
musun pito, paa nake emsawan tu nak anax dii oli gamdi nun huma.  Oli suba di
nun huma, pee tu du ptea, tu sepuh.

(Transcribed June 17, 1989, from the last
item on side 1 of a tape made by Elias Solisa.  Transcribed by Joe Devin).