Kenas Watemun
        Neat
        April 10, 1984

Ana roin naa, riqe tu nax opo an defo msikan.  Nax ina
tu nax ama mata haik.  Sira rua defo msikan naa, riqe geba roian an, da hama
lai la sira rua kaa, cuma da pali bubu paa da tenuk qei ikan pao wae likun.
Pee tu riq hama ikan et-et-etaa riqe tu nax opo an kaa, eta riqe bahaa-bahaah.
Poo da puna geba emnega mohede, riqe sei tu ikan exnaan e, riqe, da sela ela
fadae wae olon na pee.  Nake opo fene, "Ka bara sela gamda wae olon moo."

Riqe
fen mohe, Riqe sela gamdaek.  La da fada wae olon naa, fene, "Ebreman gamdae
kaku gamdoo?  Braqin gamdae kaku gamdoo?"  Da skapi nake exnai an sa, paa da
iko tuhah.

Pee tu nake opo na fene, "Dena dae wae saqan rua dii, do ku bara
hai riqe x di e faha xbali di moo, tu hai riqe x di faha xwana di."

Pee tu
riqe na sela tu nake exnai an di eta dena dae wae saqan rua dii, riq bara hai
riqe x di faha xwana di moo, da hai riqe x di faha xbali di nax opo baphaix
di.  Pee tu da sela-sela, dena ox dea uban e, da bafak e murampaax di baptea.
Di nax lian.  Pee tu murampaax dii kita geb roi an na mohede, murampaax nax
asu dulek e an roi an di.  Pee tu riqe fene, "Naq opo suba mhewa an sa pao
naa!" Pee tu da paha nax tuba, paa da bakaba fene, "Naq opo suba mhewa an sa
naa, iqax tu  ka kadux finaa, do ka oli tehux mohe."

Pee tu da paha sepu nax
tuba dii,  da skoi nake gomi rep-pitux di.  Fidii, poo an roi an naa, da pun
beta ii sa mohe, da jaga nax diri tu katanan karisen baa.  Murampaat e la d
basila olon an ba ax dii, da fasa gomi mae rep-pitux dii, paa sisa rep-neet.
La d basila xdeduk e an roi an di ba ax dii, da fas telak e nax gomi mae
rep-nee dii, paa da fas telax repa, paa sisa rep lima.  Da epsilak e an roi an
dii exdeduk e, da fas telax gomi di maen fidii, paa sisa rep paa.  Eta da
pselax hama an roi an di an di lalen pito, pee tu da fastelak selek e gomi di
maen, pee tu da gau betah tehux mohe.  Pee tu da fae isin  fidii, paa da spele
hama an roi an dii, da sniax tatax.  Pee tu ii saa tehux di fahan mohe, da
pana fidii, paa la d bafrake baah e, an roi an dii sohix fidii, paa da sekah
tu katanan di fidii, paa da sbirix pitix gampao dea bohin.

Da sex matax sepo
fidii, paa da iko sax huma.  Da iko saka murampaax nax elet e, teme harta tu
harta sax huma naa!  Harta pileix-pilehex sep-sep-sep-sepuh naa!  Pirin e,
exwali, rohit e, naman tenix rahek e, hansiax ada di murampaax di.  Teme lai
tu lai tu lai!  Fafu, geba, fafu, geba!  Paha bamsolak e.

Da pili fafu fidii,
paa da werix megekoro, gebar dii da werix megekor.  Pee tu  da egu fafor
fidii, paa da da ol tuhar gamlawe nax opo.  Pee tu da oli, pa d dohi fene da
xmata, tu da egu baraqoro di sia.  Pirino sia, xwaliro sia, tu lairo sia.

Poo
oli lawe, nax opo xnika fene, "Opo, kae egu iero na fidoo?  Mele  ku egu
murampaax nax ior salax naa, mele da iko na, paa da xmata kita."

Fen, "Moo.  A
egu murampaax nax iero na ta resex, bu a xmatah e."  Da molai dohi fidi riq
dena dii eta murampaax dii da psilax hama riqe tu nax gomi.  Pee tu riqe fene,
"Moo.  Yako xmatah e."

ee tu nax opo an dii, da laha terimakasi.  Pee tu da
sgerax nax opo an e.  Pee tu ptea tu sepuh, defo tu sepuh.

(Transcribed
1/1/88-1/2/88 by Joe Devin from track 2 of 4/10/84 tape).