Kres Solisa Neat About April 10, 1984 Geb deqen rua tu nun finhaa saa. Sirua naa,du defo oto neten saa, paa du mencari. Du tane suran e, du hapu unet e, ute nunu ixnaat e. Sirua naa, do kaka-wait rua. Nax kai naa tu nax finhaa, nax wai naa, do nax finhaa sa mohede. Sirua tane suran e. Tane suran dii lahi rua, nax kai nakek e, riq tane leuk e nakek e, sepo fixdii, nax wai hai, da tane nakek e, da tewa moo, nake kai nakex dii pamori. Eeh. Sirua naa tane suran nini sepo,, fene beto rua sa dii, sirua ix liqa nun suran. Iko fixdii, paa du toux nun suran e, gamahik e fafu mohok e nax wai nakek. Fafu moho fixdii, paa da mata. Nax wai oli fixdii, paa da prepa pa nax kai naa. Nax kai liqa nakex, yah! Fafu dii moho nax wai nakex, poo rine an e sefen haix. Nax wai oli kastau nax kai, nax kai hai mohe. Rine fene, "Kain e, ku hai, la kita rua xmasa fafu saa fixdae na." Nax kai fen, "Mohe. A hai la a xmasa moo, tu yako manyimpaq la yako tu nam kaka la kam iko." "Eeh." Nax wai naa rasa-rasa, mela, rine an iko msikan fixdii, paa da xmasa nax fafu. Nax kai helux nax katuen tu nake enhero, paa da komando nax finhaa fen, "Kita rua iko." "Eeh." Nax wai naa egu nax fafu di fixdii, paa da oli, paa da xmasax. Nax kai naa iko tu nax finhaa. Iko-iko-iko-iko-iko eta-teta-tetaaa lae lea tifun gamdi ta, du dobo Kalamiten taun sa. Eh. Kalamiten taun naa prepa fene, "Wali, wali, wali, wali! Ku sohix la ma ptea tagahax tu ma op tabaku tu ma kaa fua." Riqe fen, "Mohe, mohe, wali!" Yako naq tohon balawak hede. Paa aqa, masi fua sa bamina, pi tabaku sa bamina, bu mohe. Naq tohon an balawak hede." "Eh." Sirua iko-iko-iko terus e, eptilo-ptilo-ptilo du baxdobon tu Kalamiten taun si-sia ha dii. Kalamiten di fene, "Wali, wali, wali! Kim rua deax tagahax la ma kaa fua tu ma op tabaku!" Geb deqen di sade fen, "Mohe. Yako op tabaku mohe, tu naq tohon an balawak hede." "Eh." Sirua iko pil-pilik e. Iko-iko-iko-iko-iko dii, du dobo Kalamiten taun dii exdeduk e. Beko Kalamiten taun dii fene, "Wali, wali, wali! Deax penix la ma op tabaku tu ma kaa fua!" "Eh." Pee tu geba dii rasa-rasa, mela, da ptea esex. Paa du kaa fua, du op tabaku. Tewa moo tu Kalamiten taun naa nax akal e da pembodox geba nax finhaa, paa da plauk e. Pa d pemlosi geba naa. Eh. Ptea-ptea, tu da tuke fua tu tabaku sepo fixdii, paa sirua opi, tu du kaa fua sepo, pee deq sirua psisan. Du psisan eee eta-teta-teta-tetaa lea wesa pao pee, Kalamiten taun naa, da xmatahenen e geb deqen naa. Poo geb deqen na nax finhaa, da bafak e nax gebhaa mata, da hekah. Da heka fixdii, paa da olih. Da kastau e nax wai. Eh. Nax wai fen, "Moox! San siux kimi la a baxmasa fafu gosan-gosan la m bakaa, bu kimi rua heka tatax yako?" Eh. Nake kaka taqi. Taqi fene, "Wain e, ka bara gamdii, tu nam kai mata haix naa, do gamdoo naa? Ku iko la ku hama fene ku dapax nax baqke fidoo." "Eh." Pee deq e da keha fixdii, paa da tatik e kehex dii emsia-msian e, da tatix saa logox, paa da kodok sepo fixdii, paa da latax gamaqnaa, "Moh! I ha q na moh." Eh. Da tatix sakix dikat e. Tatix fixdii, paa da kodok sepo, pee tu da latax gamaqnaa, "Moh!" Etaa da tatik e exdedux saa. Tatix saa xdedux fixdii, paa da kodox sepo, beko da latax gamaqnaa, moix raha basaboh. Riqe fen, "Moox! I ha na ta!" Da latax lepak. Da latax lepak. Rine prepa fene, "Kakan e, ma iko." Fae nake enhero rua. Sirua hai flaluh. Iko-iko-iko-iko eta dena di du badobo kaKalamiten taun dii laqina dii, du dobo pil-pilix Kalamiten taun dii. Kalamiten di fene, "Wali, wali, wali! Ku deax la ma op tabaku tu ma kaa fua tagahak!" Eh. Geb deqen sade fene, "Mohe, wali, kami rua iko peni, tu nam tohon balawak hede." Eh. Sirua iko-iko-iko-iko-iko-iko eta-teta-teta-teta ptilo-ptilo, du badobo sakix Kalamiten taun di. Kalamiten taun dii kalax fene, "Wali, wali, wali, wali! Ku deax tagahax, la ma op tabaku tu ma kaa fua." Geb deqen di sade fen, "Mohe, wali, yako a iko, tu naq tohon balawak hede." Rine tu nax kaka naa baiko terus. Du iko-iko-iko-iko-iko-iko-iko, du dobo sakikenen e Kalamiten taun naa. Kalamiten taun di fene, "Wali, wali! Kim deax tagahax, la ma op tabaku tu ma kaa fua." Eh. Sirua deak. Deax dii, poo du kaa fua,, du op tabaku sepo, pee tu Kalamiten taun naa molai da lata geb deqen taun naa. Da latah e, geb deqen di pesnirah. Sirua psisan eta-teta-teta-teta-teta lea di tola pao pee, geb deqen naa da xmata enen e Kalamiten taun na. Pee tu da xmatah e, da ptetek etaa ancor-ancor e Pee tu da xnika nax kaka fene, "Do ka bafak e geba dii, do da xmata enen e kain fidoo naa?" Fene, "Da baxmatah oto q dae di." Eh. Da iko fixdii, paa da liqah. Da toux, resex, da teteee nax kai fidii, paa ancur, ancur, ancur e! Rine fene, "Batoux mele fu abato omono si ada." Nake kai fene, "Eeh. Ha fu abat omono i haro q dae na." Da fasak e omon pito fixdii, paa da lesax pao. Da qinyen e nax kai nake baqke dii eqan-eqan alus-alus i har dii, paa da psi-psi-psi-psi-psiak e. Da psi-psiax eta-teta-teta-teta da jadi mansia, pee tu da upih e nax kai di qeen pee, nax kai hosak. Hosax fipao, rine fen, "Haah! Yax geba qa bage eta-teta-teta sei kon!" Nax wai fene, "Ku bage moo, tu ku mata! Bara yako, do ku bage terus-terus! Ku bage taoq-taoq!" Fen, "Mmoo. Yako a bage." Fen, "Moo. Cu ku xnika kakan dii fen ka bage." Eh. Nax finhaa fene, "Bara nam wai laqina, do kae, ku bage taoq-taoq." Ku hosax tehux gamna moo." Eh. Pee deq nax wai komando fene, "Kerek e, la m iko!" Eh. Sir telo iko-iko-iko-iko-iko eta dena di nun huma laqina dih, pee tu nake wai fene, "Iqax tu wahan morin paa ka xmata nam fafu saa pi yako xmata naq fafu saa, iqax tu bara puna sakix gamdi. Bam ka puna sakix gamdii, do iqax tu ku mata, do yako xnewax ka tehux moo." Nax kai fene, "Ehe ta. O, a caan haik e nam liet e, paa biarpun gamdoo, bu ka xmata namux saa, pi yako xmata naux saa pi, kita rua kaka-wait e. Ma xmasa, la ma kaa mqesa-mqesa." Pee tu du xmasa nun fafu di fixdii, paa du kaa. Geran fidii, du dapih, paa da maqi. Pee tu lae miqgu lalen saa gamdi ta, poo du oli gamdi nunu huma ndefux. Pee tu sepuh. (Transcribed from track 2 of 4/10/84 tape by Joe Devin. Transcription completed 2/9/88).