Nompes Tasane Waenono Probably 1972 A dohin e Kacil Lewaq. Da defo-defo lalen aqa, da ptea-ptea lalen aqa, poo da prepa la nak feta Bokir-pito fene, "Feta Bokir-pito sian, basisian, Feta Bokir-pito heren, bahe-heren, Kim ix da hawa la kim toto feten an ro-roin, toto pala an ro-roin, la a puna la naq lafat la ro-roin, tu a iko la a ik hama Bae-buqa-raja di lea keha tu fulan keha." Nax ama caax aqa, nax ama prepa fene, "Kacil Lewaq e sian doun e, ku bara lalaa la ku ix hamah moo, tu yako a hama sepe naa poo oloq boti haix, bu a dapax beta Bae-buqa-raja moo." Nax anat eprepa fene, "Aman sian, aman doun e, kae di ta tu nam nasip pee, yako tu naq nasip pee! Yako la a ik hama Bae-buqa-raja di lea keha tu fulan keha." Nax ama prepa fene, "Bara ku ik hamah moo, tu yako, a hama sepe naa, poo oloq boti haik e., bu a dapax beta Bai-buqa-raja moo." Nax anat eprepa la nax ama fene, "Dii, do ama nake nasip di ta pee, yako naq nasip pee. Jadi yako la a iko hamah an ro-roin." Pee tu da prepa la nak fetar pito paa sup-supan poo du iko fixdii, paa du iko dae hawa, paa du toto pala, toto feten e, nake bleker rua. Poo da ix gamla masi,paa da sibetak fene, "Sinte yako baka kon fil kau, baka kon fil fatu, bu ya naq ina geba pee, ya naq ama geba pee, do lahek e ya naq waga iko emhewax saa, ya naq waga snai emhewax saa, la a iko la a ik hama Bae-buqa-raja di fulan keha tu lea keha!" Da siax gamdii, poo banu sepu lien mehede, poo waga snai mhewax dii, tu waga da iko mhewax dii, da barnama dii haix. Poo da keha, poo nax fetar pito taqi rura, taqi mqaha, taqi xriuk e! Nax fetar pito prepa fene, "Bara ku iko moo, tu aman hama ana fina di ta sepe naa poo olon boti haix, bu da dapax beta ana fina di ta moo." Pee tu da sohi fidii, paa da sade nax fetar fene, "Fetan sian, basi-sian, fetan doun, bahe-doun! Tu ama nake karunia di ta, ama nake nasip pee, tu yako pee, naq nasip pee, yako pee tu naq falbetan pee. Pee yax iko, a ix hamah gamdi peni, a iko la a hamah an ro-roin!" Poo Kacil Lewaq dii iko. Da iko tu waga iko mhewa et-et-et-et-et-etaa xnewax tehux laa mohe, exnewax tehux ii sa tehux mohe.. Poo da aqax gamsaxmena, fatu olo brese, da aqax fipaomori, fatu olo brese. Waga di te iko tehux mohe, tu waga di bapuna baa fat olo brese. Fat olo brese fisaxmena, fat olo brese fipamori, paa da te iko beta tehux mohe. Poo da farmaneh: "Sinte yako baka kon fil kau, sinte bolax kon fil fatu; bu ya naq ina geba pee, ya naq ama geba pee, do lahex fat olo brese eq naa bakah, la waga naa kiko ro-roin!" Sepu, banu lien mehede, poo fat olo brese di bakah fixdii, paa eqan rua,paa waga di kix leux, paa bosoh haix. Waga di iko-iko-iko-iko-iko-iko-iko et-et-et-et-et-et-etaaa suba lau sakik e lautan tif-tifun e, waga di te iko tehux mohe. Waga dii babaa-babaa. Waga di mes ke da sehe gampaomori, mes da gamsaxmena, tu da bapuna fax tuen ebrese. Pee tu da farmane fene, "Sinte baka kon fil kau, sinte bolax kon fil fatu; bu ya naq ina geba pee, ya naq ama geba pee, do lahek e waga naa da iko ro-roin." Banu lien mehede, poo waga dii iko, paa da heka, paa bosoh haik. Waga dii iko-iko-iko-iko et-et-et-et-etaa suba di Bae-buqa-raja nake snaba, nake stila, poo da toho fixdii, paa hesax waga di. Da suba saka, da fixdii, paa da mqada saka naa, Bae-buqa-raja nax elex naa, da te keha beta ii sa tehux moo. Da kalax paa Bae-buqa-raja la tatix taqga, Bae-buqa-raja tatix taqga moo. Pee tu da farmaneh, fen, "Sinte bolax kon fil kau, sinte baka kon fil fatu; bu ya naq ina geba pee, ya naq ama geba pee, do lahex taqga an saka dii datax gamaqnaa, la ya keh leux gamsaka!" Banu lien mehede, poo taqga dii datak fixdii, paa da keha suba saka. Da suba saka hinolon dii, da kalax gamax lale, Bae-buqa-raja bapisnau aki nax ama murampaax nake huma. Nax ama murampaax nax huma dii pakeh tu kaca hansiak. Pee tu nax anax Bae-buqa-raja naa bapisnau aki nax ama nax elex. Nax ama naa, do da nhewex geba rohin ganti kau, da puna bana tu geba rohin. Nax ama iko geda-geda, do da egu fafu, da egu tonal e, paa nax anax Bae-buqa-raja. Da leba gebar dii, do gebar di ta la nax ama murampaax di ta kaa. Poo Kacil Lewaq e, da kerex ax saxmenax naa, paa da te puna beta tu ii sa tehux moh. Da kalax-kalak e, Bae-buqa-raja fuka henolon mohe-mohe. Poo da farmane fixdii, paa henolon dii ekfukak. Da farmane fixdii, paa henolon di ekfukax sepo fixdii, da rogo gamdae lale, sira rua ptea! Bae-buqa-raja suba fiax kamar fixdii, paa da ptea di humhaat. Paa Bae-buqa-raja farmane fene, "Sinte yako bolax kon fil kau, sinte baka kon fil fatu; bu ya naq ina geba pee, ya naq ama geba pee, do lahek e fua dosi an e saa, la a pifua geba Kacil Lewaq naa, tu ya naqu pifuat an sa moo, ya naqu ixnaat an sa moo la a laik e Kacil Lewaq moo." Banu lien mehede, poo fua dosi tu dalu dosi tu apu dosi dii kaduk dii haix. Paa Kacil Lewaq kaaro, do tewa la du te modo beta moo, do tewa la du luax betar moo, tu du baptepax ba-baa. Sepo fixdii, poo Bae-buqa-raja farmane fixdii, paa ixnaa masa mhewaro toho fixdii, paa Kacil Lewaq kaa. Sirua kaa, sirua bage et-et-et-et-etaa beton pito lear pito, poo Kacil Lewaq eprepa la Bae-buqa-raja fene, "Bae-buqa-raja sian, basi-sian, Bae-buqa-raja doun, baher-doun e, la ku hai pee, nam lale enhaix, do ku hai, nam lale enyikux, do ku iko, tu a iko haix na ta!" Bae-buqa-raja prepa la Kacil Lewaq fene, "Esi-esi, Kacil Lewaq e, iqax tu ya naq ama do kapolo rokan taun-taun, kapolo saban taun-taun! Tu ya naq ama, do iqax tu ri nhewek e geba rohin ganti kau, da nhewex geba rohin puna bana!" Kacil Lewaq prepa fene, "Yako, do iqax tu ya tu puna beta ii sa la murampaax moo, tu di ta do ya naq amkete, di ta do ya naq ama di ta, paa ya te puna beta ii sa tehux moo. Bu ma iko peni!" Bae-buqa-raja caax aqa, du iko. Iko-iko-iko-iko, tu suba pao waga dii, du hesax waga di fidii, paa du kehah. Sirua iko et-et-et-et-et-et-et-et-etaa waga dii nax laa pun malapa. Poo Bae-buqa-raja prepa la Kacil Lewaq fene, "Kacil Lewaq e, iqax tu eta deka wala koni-koni, lipoto wala koni-koni, do iqax tu ya naq ama oli di ta, ya naq ama suba di ta di nax huma di ta." Baiko-iko tu waga an lalen aqa, poo toux, poo deka wala koni-koni, lipoto wala koni-koni. Poo murampaax di oli dae nax huma. Da kalax gamsaka Bae-buqa-raja fen, "Bae-buqa-raja, tatix taqga la a keha!" Da kalax-kalax-kalax-kalax sepe lalen telo, da sbanak haik gebaro dii, da sbanax haix faforo dii, da sbanax haix tonalo dii, pee tu bifrikex fixdii, paa da suba sak huma dii. Suba sak huma dii, da kalax-kalax aki naa, geba sa lien mohe-mohe, ge sa sade mohe-mohe. Da silu nax gomi mae rep-pitux di fixdii, paa da sil fakax hinolon di pa eqan rua. Da rogo aki, geba sa mohe-moh. Pee tu da iko fixdii, paa da ik hama nax oko raman. Da mai tohon e gamsaka fuka, gamsaka lea keha, gampa lea sebo,, tohon di faan mohe-moh. Da mai tohon gamla masi, tem nipik e Bae-buqa-raja okon faan. Pee tu da haih. Da iko fixdii, paa da hama nax oko fixdii, paa da iko fixdii, paa da kehax. Da kehak e oko dii, oko di molo. Da iko fixdii, paa da hisi danex omon. Da hisi danex omon fixdii, paa da kehak e, aso mheir pito di hai fixdii, paa du pehex yaak en e danex omon dih. Da iko fixdii, paa da egun e nax oko raman fisaka nak huma nake ila, paa da kehax. Poo asor di pehex yaax danex omon dii, poo da panax baa asor pito fixdii, paa da seho sepo boti-boti. Poo da egu nax oko raman fixdii, paa da kehax. Kehax et-et-et-et-et-et-et-et-etaaa da touk e waga di nax laa bapun malapa. Waga di nax laa bapun malapa, poo da sai rabo, da sai rabo tu oko raman fixdii, paa da babraq, paa da babraqin. Da braq, pa babraqin, poo Bae-buqa-raja di taqi. Bae-buqa-raja di taqi, Bae-buqa-raja prepa fene, "Kacil Lewaq e, iqax tu ya naq ama murampaax i ha mahi!, paa ma te puna beta ii sa tehux moh." Pee tu Kacil Lewaq sohix, paa da sade fen, "Bae-buqa-raja sian, basi-sian, ku bara hawater i ha di moo, bara bamtako tu i ha di moo." Poo waga dii braq pa babraqin e, oko raman di pee bu braq pa babraqin. Poo murampaax dii poo la taba aan di waga dih. Da taba aan di waga di, poo Kacil Lewaq sibetax fixaki fene, "Sinte limbiq isin ruaq dii, do nun ii sa moh-mohe, nunu rupa sa moh-mohe; bu limbiq isin rua q dii nun rupa sa ma dii, nun ii sa ma dii, do iqax tu kim iko la kim seka mhewak e murampaax, tu yako a tuux fahaq bu da beha, tatix fahaq bu da beha." Ged mehede, poo la banu lien mehede, poo lembiq isin rua di becikuko fixdii, paa du faen e nax ama murampaax dii raman rua. Fae nax ama murampaax nax raman rua fixdii, paa ekfatuk sepor boti. Poo waga di hekax gandii pana isin di! Oko dii ba bex di bek. Dii, makin murampaax di tu fahan fixdii, paa da sai, paa braq pa babraqin. Sai babraq pa babraqin e, da taba aan sakix fipaomori. Taba aan sakix fipaomori, Kacil Lewaq e sibetax gamdibex fene, "Sinte yako bolax kon fil fatu, sinte bolax kon fil kau; bu ya naq ina geba pee, naq ama geba pee, do iqax tu ya tuux fahaq bu da beha, tatix fahaq bu da beha. Lembiq isin rua q di iko la kim fae raman, pi kimi emkuax, ramax fidi kimi. Tu yako a tuux fahaq bu da beha, tatix fahaq bu da beha." Bicikex gamdii mehede, poo banu lien mehede, poo lembiq isin rua di iko fixdii, paa du faen raman rua selek. Poo waga di hekax gandii pana isin sakix. Poo oko dii sakix sai fixdii, paa braq pa babraqin. Murampaax dii braq pa babraqin, poo da taba aan, pa d taba fahan e, da siuk en kehex isin di fixdii, paa da dae fixdii, paa da tetex lopok e nax amkete murampaax di nax faha xwana. Poo waga dii hekak! Murampaax na pee tehoh tu oko raman di bex si-sia. Braq pa babraqin. Teho tu oko raman di braq pa babraqin, da taba faha xbali selek e, Kacil Lewaq e siuk e kehex isin di fixdii, paa da fa telak sakik en e nax ama murampaax dii nax faha xbali. Gamdibex-gamdibek, sepe lalen aqa, murampaax na teho sakix, poo da teho tu oko raman dii si-sia. Teho-teho-teho-teho et-et-et-et-et-et-eta teh taqoro, da taba kadan kahan. Da taba kada xwana, paa la d purux waga dii, Kacil Lewaq siuk e nax kehex isin di fixdii, paa da seh telak e murampaax di nax kada xwana. Poo waga di hekax gandi sapan! Murampaax na tehoh tu oko rama et-et-et-et-et-et-eta da teh taqoro. Fen la d taban e kada xbali selek e, Kacil Lewaq siux katuen isin di fixdii, paa da fa telak. Poo nax sisa tina gisa. Nax tina gisa dii, da bawea-wea rahex tu oko di. Da wea-wea rahex tu oko di, poo oko di hekax gandi sapan! Paa da teh taqor dii. Da teh taqor dii, poo Kacil Lewaq eprepa la Bae-buqa-raja fene, "Bae-buqa-raja, iqax tu ka odox lalem pee, tu yako, poo a pun tehux ii sa tehux mohe di ta!" Bae-buqa-raja dii, cuma da baegu baa nax pikfuan an emsian an emsian di fidi nax ama tu nax ina baxneik. Da egu pikfuan di fixdii, paa nake ama murampaax di braq pa babraqin, tem da tuux pikfuan di fixdii, paa da ladix polax baa di nax ama nax oko raman di. Tu nax ama murampaax di molo tu oko raman di gampao masi bohin. Poo sira rua di hekax tu Kacil Lewaq nax waga di, sepe bosoro. Bosor, paa braq pa babraqin di Kacil Lewaq nax ama, poo rame hek, paa da baxbukak la waga na! Du rame-rame-rame-rame, poo nax feta bokir pito fene, "Heh, aman e, Kacil Lewaq e da oli haix aqa." Kacil Lewaq oli, pa babraq pa babraqin, poo da suba dae, da toho. Da toho, poo nak feta bokir pito naa, du egu pirin, paa du atur pir boti. Du atur pir boti, da puna gamdi tohon fila masi et-et-et-et-et-et-eta basuba dae nax ama nak huma. Kacil Lewaq toho tu Bae-buqa-raja, sira rua iko di pirino dii, du pehe di pirino dii, erux ben pirino dii saa kfakax bu moo, saa like bu moo, saa tiqen bu moo--pirino dii ba gamdibex et-et-et-et-eta basuba dae Kacil Lewaq nax ama nak huma. Poo du rameh. Du rame et-et-eta betor pito, lear pito, rame bukat e, rame bapuna msian, du Kacil Lewaq e da dahax beta Bae-buqa-raja, paa da kaweq tuha Bae-buqa-raja haix. Pee tu sira ptea ba dii, pee tu sepuh. (Transcribed 2/27/88 by Joe Devin from track 2 of Samson tape). Nompes Tasane Waenono Probably 1972 A dohi endohin saa. Lalen saa, anak saa tu rin nak ina, du iko paa du ik hama fuat gonen fidi wasir-wasiro. Du iko, paa du iko-iko, poodu dapax beta fuax gonen saa mruru-mruru-mruru-mrurut e. Poo nax ina naa taha fuax gonen dii. Da tahah, poo nax anat e raqi fene, "Inan e, laix yako tu nax daholo." Nax ina sohi, paa da sade fene, "Ama, kalo nam daholo, do nam ama, da olox-olox sapan e?" Fen, "Hei, hei, inan e, do gamdii, do naux raman wain olik e!" Fen, "Ama helen e, bisopa ka! Kalo namux raman waen, do nam ama baxwae-xwaex sapan sakik e?" Pee tu du iko. Gamdii, poo nax anax dii pekah. Anax di baodo baa fiax lalen fene, "La ma mkuah? Naq ina naa, da xbanax kon pee, da puna kon gamnaah!" Riqe di ikoh. Sira rua di iko-iko-iko-iko et-et-et-t-etaa suba ax fuax gonen saa sakik e, nax ina tahah, da prepa fene, "Inan e, nauk e waqan an saa." Fen, "Hei! Ka nam waqan saa, la nam ama bawaqax-waqax sapan e?" Fen, "Gamdii, do inan e, nax raman wae paobo-paobohi paskali olik e!" Fene, "Namux raman waen pao bohi paskali, la nam ama baxwae-xwaex sapan e?" Anax di caax aqa, tu da iko. Da iko-iko-iko-iko-iko-iko-iko et-et-et-et-etaa suba ox toho xnadun saa, da hai toho xnadu gampao murampaat. Da hai toho xnadu gampao murampaax et-et-et-et-et-etaa da suba toh tifun e, man goli saa, da loi, pee tu da kalax fisaka kau lawan fene, "Lindo, Lindo! Bara hai tohon dii, tu murampaax nax tohon di ta o, Lindo, Lindo!" Anat an dii caax aqa, da waku fatu fidii, paa da spelen manux dih. Ben, "Yako la a iko, ka kalax-kalax yako la sapan?" Poo manux di heka, anat an di iko. Da iko-iko-iko-iko-iko-iko et-etaa seih e, manux di loi fidii, paa mrururux fidii, paa da kalax fene, "Lindo, Lindo! Bara hai tohon di tu murampaax nax tohon di ta o, Lindo, Lindo!" Anax dii,da waku fatu fidii, paa da speleh e. "Yako la a iko, moo, kae pixbele yako?" Pee tu da iko-iko-iko-iko, poo da braqin e murampaax nake esnaba. Poo muampaax di maix beta okon faan. Poo muampaax di iko fidii, paa da iko qei-qei-qei sepe da bafrake anat an di! Paa da oli tuha anax di fidii, paa da xneix saka muampaax nake loteq. Da xneix, paa murampaax naa, da iko, do da egu fafu, egu tonal e, egu geba, egu e rupa-rupa ixnaa pileix-pilehex naa, paa ixnaa gosato, ixnaax yaq mansia kaah dii, do da eguh paa e Lindo kaah. Bu geba dii poo murampaax di ta kaah. Lalen aqa, poo murampaax di iko, poo da xneik e Lindo fene, "Opo, opo! Ku defo. Ku defo, tu a iko et-et-et-et-et-et-etaaa kira-kira fulan lalen sa gamdi ta teme a oli." Anax di defo aqa, poo da taqi. Murampaax di iko mehede, da prepa fene, "Ku defo, tu ramak e haa la bahaa ka, poo teme a kaa posom, tu posomo oin hede." Murampaax da iko, da iko, da iko, da iko, et-et-et-et-etaa sepee miqgu lalen saa gamdi ta, poo anax di taqi. Taqi-taqi-taqi-taqi-taqi-taqi-taqi et-et-et-et-etaa taqi-taqi lalen aqa, poo e karasenax saa, da suba dii, fene, "Ka taqix sapan haan dii?" Bene, "Yako, a taqi tu murampaax eprepa fene, 'Ku defo na ta, tu a iko sepe fulan lalen tem a oli.' Poo da prepa leux fene ie, 'Ku defo na ta, tu ramax tu ku haa teme a kaa posom fuam, la--a xmata ka, la a kaa posom fuam.'" Poo riqe naa,da taqi dii, pee tu karasenax eprepa fene, "Iko la ku haix yako." Da caax aqa, poo da toho fidii, paa da haik e karasenat an di. Da hai fidii, paa da toho fidii, paa da hai gamlawe toho katati. Hai toho suba la katati, karasenax di prepa fene, "Kae keha leux, la ku ptea sax fafaq. Ramak e yako a hai, la yako ptea baa di mhisin eq dii, kae keha la ku ptea saka mhisi minfafa dii." Da caax aqa, poo da iko fidii, paa da keha fidii, paa da saka mhisi minfafa fidii, paa riqe dii, da pteah. Poo dekax lalen aqa, poo nax opo an di oli. Nax opo murampaax di oli fidii, paa da suba dii: "Naa, naq opo Lindo naa da fidoo haix naa? Da heka haix na ta pi?" Da mumi toh selax dii, nax opo wahan faan moo. Da mumi toh manux dii, nax opo wahan faan moo. Da mumi dix-dix-dix-dix tohon dii, nax opo iko tohon di saa mohe-mohe. Da mumi gamlawe nun toho katati dii, nax opo wahan faan! Pee tu da haih. Da hai manux et-et-et-et-et-et-etaa da hai suba lawe, da aqak e gamsaka luken dii, nax opo baptea. Pee tu da kalax nax opo fene, "Opoo! Toho la m oli." Nax opo sade fene, "Opo murampaat e! Yako a toho la a oli aqa ta, beso ku iko la ku egu namu nhero, nam katuen e, nam gomi, la ku parqararo pao kau lahin naa. Ku kusex namu nhero, ku parqara nam katuen e, tem nipik e opo keha la da egux yako." Nax opo murampaax dii caax aqa, da iko fixdii,paa da saki fidii, paa da egu nax katuen e, nake enhero, nax gomi, paa da parqara sepor pao kau lahin di. Tem nipik e da keha saka. Da keha-keha-keha-keha et-et-et-et-et-et-etaa braqin braqin-braqin e emhisi minpaon dii, ii naa hisaleu anan an dii ekwakax geda-geda, gamheg-hegah e! Da salgae fixdii, paa da moho fixdii, paa da durax nake enhero. Da gampaox, paa nax katuen di sasah e, nax gomi sasah e. Pee tu da matah. Da mata, pee tu nax opo Lindo an dii, da oli dae. Da oli dae fixdii,paa da toux sepo ior di gamdii, poo da haix karasenax di. Karasenax di toke tohon et-et-t-et-et-et-etaaa suba di nak huma. Poo Lindo nax ama tu nax ina prepa fene, "Kaasenat e, kae nam suka sapan e?" Fen, "Moo. Yako naq suka ii saa moo. Cuma egu baa tepux anan emsian la yako." Tepux anan emsian dii, pee tu da eguh, paa karasenat an di kaah. Poo Linda prepa la nax ina tu nax ama fene, "Ma iko. Biar kim puna yako gamdii, tapi ma iko la ma eguk e murampaax nake exwasaro." Du iko fixdii, paa du hatuk e murampaax nake exwasa roi, xwasa haat e. Egu fidi sleban e, egu fidi rohit e, et-et-et-et-etaa da eg sepo murampaax nake exwasaro dii. Pee tu du oli fixdii, paa du ptea. Pee tu sepuh. (Transcribed 2/29/88 by Joe Devin from track #2 of Samson tape).