"Kaka-waix Pito Tu Nun Ama Mkedan" By rubin solisa April, 1984 Probably at neat. A dohi kaka-waix pito tu nun ama mkedan. Sira na du ptea-ptea, defo-defo, pee tu Kacil Miqgiwa na da prepa la nax wair fene, "Wai sira, ma iko la ma ix liqa neten." Sira na ikopaa liqa neten. Geba mkedan fene, "Yako an na a Hai toqi." "Eh!" Sir pito dii tu nun ama mkedan e du ikopaa fen du ix liqa neten. Du iko dena di tapa elen fixdii,Paa du puna tapa. Puna tapa eta du pun sepuh, poo lea baremax hede. Nunu kai, Kacil Miqgiwa, fene, "Gebarano, kim liqa kaur na huma tean-tean napaa sapaa m kaa mhawex." "Eeh!" Sira pito di du sepa kaur pito, du spelex i har pito. Paa du kaa mhawex tu nunu maqkaur. Pee tu du bage. Bage eta sup-supan, fene, "Wai sira, ma iko la m ela neten, la ma penhapo." Sir pito di iko epsaman. Nun ama mkeda an badefo. Du iko epsaman fidii,Paa du liqa neten dii. Et-et-et-eta du oli, sira pito di bawae-wae tu tona xnener pito. Sira na oli epsulun, fene, "Aman e, ku liqa tonal ebhaan dii, la fuka sa la k pefah, l ku kaa." Pe tu nun ama na da liqa ebreqe pigi afan sa fixdii,Paa da ekhafah,Paa da pefa fukan, pa d kaa leux tu maqkau. Sepu teme du tiwa gerano,Paa du pefaro,Paa du fotor,Paa du tedax kahano, du dapi kahan fixdii,Paa du kaa mhawek. Supan e, sir pito iko gamdi bek. Du oli, exnener pito. Na du penhapo mahede, tu Du liq sepu neten mahede. Eta du liq sepu neten, poo fene, "Gebarano, ma dadax ua." Sira dadax ua fixdii,Paa du penhapo. Du penhapo,Paa lamsupan e, du ix liqaro, du oli bawae-wae tona xnener pito. Na du bambahapo unex tanheit na ta hede. Du penhapo-penhapo, du iko lalen saa, poo nun ama na ptea-ptea, fen, "Hah! Yax geba qa sei kon tu endefux haix. A ba-iko kon gamaq saka naa." Nun ama na iko gamsakak e, parsis da dapax midun fatan sa baeblume-eblumeh. Poo da patuh. Patuh fidii,Paa da fae saa, "Esh! Midun na kaa gosa resek! Mina-minan!" Da edah. Edah pao dii,Paa da fen, "Moo, patu rua sa la a ol tuhar la kam kaa holix." Ehe, da patu sia,Pa d fokirpaa da oli tuhar. Pa da ptea pee i har bawae-wae to tona xnener pito. Poo sira na du... Kahano egu kau, kahano pele uka, kahano egu fean e,Paa sira geb pito gamaqa du gau psamax-psamax ior,Paa geda mahede poo seporo. Poo du liq gogor,Paa du pefa tonal e, du tiwa tonal e, kahano pefnoto... Nun ama mkedan na do riqe an batea, tu riqe geba mkedan an. Po lamsupan lae sa poo du iko. Paa samsuex bosor pee nun ama mkedan na da lepax logon fidi,Paa fene da sax qei nax midun. Riqe sakapaa d patuh,Paa k pax-patuh poo da olih. Lamsupan e riq sakix gamdi bek. Poo yako fene geba bohot e caan. "Sane fixdii,Paa riqe kaduxpaa patu ya naq midun?!" Geba bohox taga dena di fixdii,Paa da FLALIH! Flali-flali-flali-flali geba mtuan an di et-et-et-et-eta getex,Paa da baxqoton. Poo geba bohox di ikoh. Eta dek haa sa toho fil dii,Paa da fage geba mtuat di teme baqux. Baqux,Paa da hosax fixdii,Paa Ego nax miduno,Paa da olih. Oli la pao huma,Paa sepe da enhewex banapaa da barara-rara, poo nax anato oli, fen, "Akeba kan, aman e! Kae emkua ka haan-haan fixdii,Paa egruhax ka lep-lepax, log-logox?" Fene, "Yako an e, yako iko fi saka dipaa a pehe espahix,Paa a moho,Paa ioro dura kono. Lakato laka kono. Yax geba mkedan na gamaqa, a iko , a kita i gos-gosa moo,Paa a pehe espahix,Paa a moho." Nax anato percaya fen, "Laex resek, tu geba mkedan an e." Di, lamsupan e, sir ikopaa du oli braun, "Ama! Gebar pila! Geba keda naa, emkuapaa haan-haan naa, pa...? Akeba! La riq moho lea-lea sas teke haan-haan naa?" Eta lalen telo, poo nunu kai miqgiwa na prepa la nax wair fene, "Gebara ano, cu ma xnoko ela geba mtuan eq na fen sap-sapanpaa haan-haan naa!" Poh supan an sir fen, "Aman e, ku defo la ku bapsulex. Bara iko neten sa mohe-mohe, tu aqax nam kawaro dii, mo do ku iko la ku moho selex aqa, do ku mata!" Fen, "Moo, ama, a iko neten sa moo, tu a geba aqa, naq kawaro empeix." Sira na iko,Paa du bapancixemlemo, poo du bakerex exnoko, poo geba mkedan na fen mo tu riq leba nax gomi,Paa da ikoh. Da iko, po, naq roko, lal potoh tu lae midun mina gosa-gosa saka saka naa, kae fen da ba-iko mo beta? Da saki lepak! Saka,Paa samsuex da tirak e midun,Paa da badahex gomi di gamakix pe, da caan, hexeh! Geba bohot iqan polax! Poo sir pito na du kerex boli nun ama mkedan haik. Du odo, "Exe! Katage tu geba mkedan na da pembodo kita fen moo, da ikopaa da moho, kabatage geba di i ha aqa!" Du bakerek exnoko. Geba bohox na fi saka na da eplumax geba mkedan an na potak-pota-pota-potaek e, fene, "Katefen e ku maqaglate pi ku maqasenu pi ku emkua-emkuapaa haan-haan dii,Paa yako flalipaa flali kae do kae tobax mohe-mohe?" Naq roko, lal potoh tu midun minan, kae fene batobax betah?! Da fi saka, poo da fasax i megex sa tehux mohe, tu da fasaxk ua pipaqa gamdi, uaskikit e, i pipaq-pipaqaro! Paa taga logox, pah da hesax geba mkedan dik,Paa da fen mo tu riq baflalih lalen telo pe, nun kai Kacil-miqgiwa xraak! Fene, "Katage tu geba keda na da jaga ikopaa da oli, do kawahpaa gruhax-gruhak e, kami exnikah, fen moo, riq moho, kabatage tu kae geba di i ha na ta!" Po da geda mhuda pana mahede, poo yako fene la kae hek beta hede? Da bahorak e enhero sa haix mo? Poo du xmata geba naa. Du olih. Fene, "Geba mkedan naa, ku oli beka, mele kam pekselex ka! Geba bohot eflali riqe, fen moo, riq moho,Paa da xruhah, kabatage nax akal. Beso geb bohox di exmatah moo, tu du emkua du bahaik e!" Du olih. Poo mohe. Du fen, "Ama, poo sa keme midun geran naa, poo mohe." Geba na saki-saki tehux moo, tu mata haix la fen da sakih di fa do? Po sira na du penhapo-penhapo, fen, "Mohe, gebarano, ma kerexpaa rahe pe." "Ehe." Sira na sopi uka fixdii,Paa du ix pixnane. Epredex-epredex gamna du iko fen du ix liqa nun surano, oli du babekux-bekux fafor kisin pito. La xneir na la sane kaa seporo? Poo du pexniwa,Paa duexnahiro, du fotoro, poo sira naa, du penhap-penhapo, du pexnane, eta fen moo, boho-boho haix na ta, poo du oli. Oli pao, du rame tu nun dagiqor naa, du puna pesta,Paa eta beton pito leaR PITO, PEE TU SEPUH.