Epkitan-katemax-galbotin
        By Semi Solisa
        April, 1984



Da ptea-ptea, poo fene, "Yax geba qa, naqu laleq musu ba aq pe."  Poo da ix
musu.  Fene, "Yako la a ix musu tu e epkitan pito."  Poo da ptea-eptea, poo da
ix musu tu epkitan pito.  Poo da janji epkitan pito, fene, "Iqak, tu deka sida
koni-koni, lipoton sida pa koni-koni,Dekat e faqra lalen pito-pito, iqax tu ya
naq lebin rua toho."

Fene, "Gamdi, do beso ku janji matax la kami gamdi ta!"


Poo beton pito, poo du pte papax di sabua sa.  Fene, "Iqax, tu ba na sabua na
ta, do epkitan pito."

Pe tu Epkitan-katemax-galbotin e da esgedax nax wai,
fen, "Ku iko tu fux boti eq na, la ku bura gebaroq baq di, la du kaa, la du
msihi, pi su ku egu e eha pa san pito, paa du ino, paa du msihi, paa du ptea
di sabua."

Poo fene, "Geba aqax, do da babage dabax tu nax finhaa?"

Tanik e
Epkitan-katemax-galbotin di caax, "Iqax, tu geba ramaxboho yako haik!"

Tanik
Kacil-bohi-efraqin enax bisnoax gedah.  Fen, "Iqax, tu kim bapte-eptea na, bu
iqax, tu lea lalen rem-remax na, i sa kaduk!"

Fene, "Bara emtako, tu i sa mo.
Ii sa, bu kam geba haato,  Fen mo, tu kae i bohi efraqin!"

Tanik e, resex, poo
Rin pili  Nax ioro, paa riqe bag hawa.

Poo Pkitan-katemax-galbotin e da iko.
Paa sub pa toh wae, cii-ciik e da bakerex sax wana.  Wana kasapax pakeaq.  Paa
da bakerex saka, paa da babage saka wana fafan.  Pa d toux lawe sabua, epkitan
pito di baptea.

Fene, "Kim prepa yako fene babage tu finhaa, do kimi aq ha do?
Suba gamahix beka, la kim bara ptea fiaki."

Poo du ino sepu eharo na haik.


Fene, "Suba rabo gamahik!"

Poo du platan.  Eplata-eplatan sepu, poo
Pkitan-katemax-galbotin e da esrasa leuk e epkitan wan-rema-taun.  Da esrasah,
paa snain rua baefkaka.

Fene, "Ku baesrasa kam nam roko di, du sisa kam gebar
lima sa maq na!"

Poo Kacil-hena fene, "Kae i an di musu yako mahede!"  Paa geb
hena fene, "Kim musu leux fi di, tu a ptea la a baxnoko hede."

Poo nax rokoro
musu, musu tuha geba di, Epkitan-katemax-galbotin!  Musu tuha, paa du platan.
Du platan tuha Epkitan-katemax-galbotin.

Po, eplata-eplatan, poo
Pkitan-katemax-galbotin e da lata sepor sape sisa geb-hena, poo da almua.  Da
almua, paa da pan  Da  Mua,  Pe tu newax tehux mohe.

Pe tu sepuh.


        Kabiti-poso
        by Semi Solisa
        April, 1984.



Da ptea-ptea, poo nax nahato iko phaga, poo riq badefo emsikan.

Riq badefo,
paa da caax fidi toho, iqax, tu tohon gugu!  Poo da tatix nax soga di fisaka.
Nax nahax nax soga.  Poo da baeptea di humlale, paa da aqax fidae tohon, poo
hiba-karan-siku ha di haix.

Dena di, poo hiba-karan-siku fene, "Epteax wa poto
rabo la m ino, mo do ka tewa yako mo, do wadum tol bexaq-bexaqa, olom tol
bexaq-bexaqa!"

Fene, "Tu ya naq teqix fidi kae, ya naq sapan fidi kae?"

Fen,
"Mohe.  Epteax wa potox, mo do ku egu tabako tu fua la yax kaa rabo  Lalgosan
mo, do cilax beta ka tu yako, tu a ptete ka!"

Fen, "Moo! ya naq nahax oli
denaq na, do iqax tu cilaka kae!"

Fene, "Do ka nam nahax sane?"

Fene, "Ya naq
nahat e Kaci-rawaq."

Fen, "Kaci-rawaq iko haix fido?"

Fen, "Da iko phaga.
Sohix, tu til-tilo da oli di tah.  Eta rahisin baneno, do iqax tu riq oli di
tah."

Poo sirua ptea-ptea, poo da hiba-karan-siku komando Kaci-rawaq nax feta
Kabiti-poso fene, "Ku egu eha rabo la a ino, mo do cilax beta ka!  Egu fua
rabo la yax ka, mo do cilax beta ka!"

Poo nax feta fene, "Ya egu fua la kae tu
ya naq tenix fidi kae, ya na sapan fidi kae?"

Fene, "Mohe!  Mohe!"

Poo sirua
baeplawa-eplawan.  Poo rahisin gugu!  Rahisin gugun bapuna emsian!

Poo
Kaci-rawaq oli tu nax asu emheir pito fene, "Oko faa exmeqen!  Oko faa
exmeqen!"  Poo nax asoro dulex geba di.

Poo hiba-karan-siku fene, "Dule mo, tu
nam opo rabo gamahix, tu picaya! yako esgedax nax feta la da exmasa la a kaa,
bu da exmasa la ya kaa mo!  Riqe faka fua la yx kaa mo, da bora yako mo!  Poo
picaya geba di ta pe!"  Poo da olih.

Oli dena di fene, "Ka geba na ta, do nam
feta dohix kae fen kae epkitan e!  Kae geba emhana!  Poo iqax tu ya laleq
leqina kita rua musu!"

Fene, "Ma musu, tu ma musu, bu yako emtax mo."

Poo du
baeptea, poo badifuk e Kaci-rawaq lolin-lolin e, da baeptawa lolin-lolin.  Poo
hiba-karan-siku fene, "Picaya! ka gebaq di nam balix mata pe!"

Fene, "Yako caa
pe kae stori tu ya naq feta.  Aso baeqa dae di, bu yako caak e kae stori tu ya
naq feta boho-boho."

Fene, "A stori tuha di la d faka fua la a kaa, du guf
tabako la ya opih, bu riqe caax yako mo.  Tanik e yako stori qei riqe."

Fen,
"Gamdi, do iqax tu ka stori qeih haik e, du inqax tu ku egu.  Bu iqax tu namu
enheroroq di iqax tu egor hansi-hansiax la yako.  Nam baraq teqix, ku saki la
ku eguh."

Poo hiba-karan-siku da keha nake malige eflawa, paa bisnasax, paa da
iko, paa beuk.  Poo da oli dena di nax humdamun, paa da tatix nake baraq, paa
da egoro.

Da ego baraq paa da ol tuharo fen, "Ku ham baraqo, baraq i haroq
nah!"

Poo da exdue di, paa da egux.  Fene, "Iqax tu kim rua kaweq bekah, tu
kimi qasmori tu fina emhuka paa hai kim nim lalex, paa iqax tu kim kaweq la
kim tea la karaja ya naq ior."

Pee tu sepuh.


        An-kasiaq
        by Semi Solisa
        April, 1984.



A dohix An-kasiaq.

An-kasian e, da ptea-ptea, poo da prepa fene, "Iqax tu
yako, ya geba emsian, paa a iko gamdi lea sebo.

Poo resek.  Da toto pala, toto
feten.  Riqe emsikan.  Toto pala, toto feten, paa da iko gamdi lea sebo.  Da
iko saka emkele-emkelen.  Da keha nax malige eflawa, paa da iko.

Sape dena lea
sebo, fene, "Iqax tu a toho ba na beka, tu dena huma haik."  Poo riqe toho.


Toho dena dii, poo beto, poo da ix rondah.  Ronda-ronda-ronda-ronda, poo e
Tuaq Kolatu fene, "Ka mambadena fido?"

Fene, "Ya mamba dena fidi lea toho na
ta.  Yako An-kasiaq.  Naq ina mata haix, naq ama mata haik.  Yako emsikan.
Paa kim pun teqix do kim puna, kim pun sapan do kim puna."

Fen, "Moo, kami caa
gamdi, tapi eta kae lalem gamdi, do iqax tu ku exnika ya naq anat."

Fene, "Ka
nam anax na do anax sane?"

Fene, "Bukhena."

Paa Bukhena fene, "Ehe ta.  Beso
fidi riqe la riq eruk.  Yako do yax erux rahek.  Beso fidi riqe."  Poo Bukhena
fen, "Gamdii, do gebaq ha do aqa, bapan e?"

Fen, "Moo.  Riqe ma dae nax opo
hede.  Supan tem da kadux supax naa.  Sup-ksupa eprede-epredex tem da kaduk."


Fen, "Eeh.  Supan tem da kadux.  Ramax fi di riqe.  Ri nax lalet."

Poo
sup-supax poo riq kadux.

Kadux dena dii, poo du paha tuba, fen, "Kae nam suka
ana fina na?"

Fene, "Ya naq suka."

Poo gebar hulun! Gebar fen, "Gol e!"  Paa
du emqaha, paa du hulun.

Poo fen, "Kae nam suka?"

Fen, "Ya naq suka."

Poo fen,
"Gamdii, do ku saki ego nam baraqor beka, tu ka nam suka haix gamaqa, do kae
qasmori, paa eta ka nam suka gamdi, do ku saki bekah!  Supan do ku saki."

Fen,
"Eeh."

Poo supan, poo da exduax nax walir paa da saki ego nax baraq.

Ego nax
baraq fix dii, paa da saki, paa da kaweq tuha anafina dii.

Kaweq tuha anafina
dii, poo fen, "Iqax tu kim tea la kim karaja ya naq ier, tu yako emkeda haix,
paa kim karaja ya naq ior, la kim aqax ute yako, tu yax geba emkeda."

Pee tu
sepuh.