Sirbodo Cefal By Mukasoto Leslesi Selwadu July 14,1987 Nax ina nax anax dikax saa mo tu odo Sirbodo. Pee tu rin ikoh. Rin bina la nax ina fene, "Ku badefo, tu a iko." Da iko eta da suba ax Tuaq Kolatu, pee tu da bina la Tuaq Kolatu fene, "Ku bina la nam gebar la du flali tuba la yako cefal!" Fene, "Cilaka aqa, tu yako cefal, bu yax hewax naqu pakeaq saa moo." Tuaq Kolatu fen, "Ramax ya egu pakeaq la ka pake la kae cefal!" Pee tu da egu kata remat e, da egu labun e, da egu e lastare. Pee tu da pakekor, pee tu da cefal. Rine cefal dii, rin bacefal e qei-qei tohon di snuban. Pee tu da cefal-cefal moo, tu da heka tu e Tuaq Kolatu nax ioro. Nax pakeaqo! Da oli suba di nax ina, da bina qei nax ina fene, "Qina, ku lipa naq pakeaqoro!" Nax ina fen, "Ka egu ii har naa fixdoo?" Fene, "Lipar pao, tu gamdi kae namu ramtaik! Yako egu nam ioro?" Pee tu rine fen da saki. Da saki sakix, pee tu Tuaq Kolatu da esgedax nake gebar pa du hapuh. Du hapu Sirbodo! Du hapuh fixdii, paa rine--du exroqax tu exroqan, paa du balehih la masin. Pee tu geba mtu Kima liho mahi, pee tu rin bina la geba mtu Kima fene, "E, ku hita kon peni, geba mtu Kima! A iko buu moo do a buubaa Tuaq Kolatu nake exroqan, do silaka kae!" Pee tu geba mtu Kima hitah. Siru geba mtu Kima exwakun etaaa da frugux sakix geba mtu Kima aki liax dii. Pee tu du suba mahi uteh fene, "Eguh beka, la poloh la masin!" Geba mtu Kima taqi fene, "Yako na rine Sirbodo dae mo, tu yako naa rine." Fen, "Mohe. Ii katota geba ha di ta, pa a eguh la a poloh la masin lawe!" Pee tu rine iko fixdii, paa da ix keha fua, da keha dalu. Du egux geba mtu Kima, pa ix poloh la masin. Rine ego nax fuaro tu nax daloro fixdii, tu da xmulux tuhar la masin. Pee tu da oli tu xnaqix filawe, da bina qei Tuaq Kolatu di fene, "Aqak e, kim polo yako tu dii, kim bapolo yako sambetax oto e nim ina tu nim ama nake eskakux, pa aqak e, du atux fua tu daloro q naa la kimi!" Pee tu sira bataqi miti-miti. Pee tu fen, "Supax naa, a iko la e a eta nim ina tu nim ama nax huma, la ma toho otoh ma la masin fohin!" Pee tu da iko. Supax pee, geba Tuaq Kolatu tu nax gebar miti-miti iko pa du hai tu rine. Et-et-etaaa ma lawe lautaq biru, pee tu du pesarfaha, tu rin pese geba Tuaq Kolatu dii fahan e, pee tu du stubix fapao, fen moo tu du toho qei nax ina tu nax ama nax huma! Pee tu rin laba fahan fidi Tuaq Kolatu, paa sir bamolo emsikan e, rin oli sakix tu waga di qei Tuaq Kolatu nax ge fina rua pa d kaweq tuharo! Pee tu sepuh. (Transcribed 11/20/87 by Joe Devin from track 3 of Mukarehet tape 1). Tuaq Kolatu Walfinat By Mukasoto Selwadu July 14, 1987 Yako la a dohi Rajamuda. Da iko eta da suba nagri geba kahai-Opo. Pee tu rin nax suka la rin defo baa di geba dii. Pee tu ana fina saa fidi gebar di nin ana emhuka saa, rine exnika fen da eguk e. Pee tu gebar dii huke nin anax la rine, Pee tu da oli tuhah qei nake geba mtuato. Beka Tuaq Kolatu saa da kita fina di gosa tirin, pee tu da loa akal ute Rajamuda fene, "Yako la a huke pakeaq la a gaji kae la ku xnogi naqu xnogit." Pee tu da wada pakeaq e, da egu kepeq e, paa da huke la Rajamuda dii. Pee tu da iko xnogih. Da xnogi, pee tu Tuaq Kolatu dii siux nax gebaro pa du ix eguk e Rajamuda nax ge fina. Famahi, rin batapix baa handox, paa rine fene du pese xdiik e Rajamuda nake ge fina la rine walfinat. Fina dii, da taqi qei nake bajaulato, rin basoro neten fuun e, fina di hekah, paa tewah tehux mohe! Dii, dawa saa gamdihe, dawa saa gamdihe. Rin sale gaji turus-turuus, e Tuaq Kolatu naa da punsusax fina di turus-turuus. Pee tu fina dii da kehak e nake molige flawa, paa da oli fasaka alaq fafan. E, Rajamuda di, da garo pa Rajamuda ine toron. Da ine toron e, pee tu da wana, pee tu fina di bina fene, "Ku toho tu dekax la Rajamuda da bafa." Pee tu dekax wala alus-alus di toho, da kadux di Rajamuda, pee tu da wanah, la da mqadax qei na ge fina naa, da bakitah e blafo-blafo masax lokono. Da taqi et-et-etaa . . . Pee tu da helux nax todo fix dii,tu da ix basa Tuaq Kolatu dii tu nake ata pol-paa, tu nax fina-anato haluux. Da basa sepor tu sefen tu Tuaq Kolatu jaga iko siasax nax ge fina, paa fene da kaweq tuha, bu fina di xrei tirin. Pee tu sepuh. (Transcribed 11/20/87 By Joe Devin, from track 3 of Mukarehet tape 1). Sirbodo Mata By Mukasoto Selwadu July 15,1987 8:30 PM Eee, a dohi Sirbodo da hoso fuax yaben. Da oto fuax yaben, pee tu da hosoh. Da hosoh, paa e qeiwaex sa betah. Qeiwaex di betah, pee tu--waex di qaan fixdoo?--qaan e Kastika. Qeiwaex dii, Sirbodo falqaax fene, "Kastika." Pee tu fene da iko kfilix qei Tuaq Kolatu. Fene, "Tuaq Kolatu, ku safe naqu qeiwaex naa,tu naqu qeiwaex naa, da buux kepeq pera." Pee tu Tuaq Kolatu safeh. Pee tu da bina la Tuaq Kolatu fene, "Ku egu qeiwaex naa, do eta ku pakah, ku psubax fili nake exroqan pa ku pakah, do ku bara pese xdiix, moo do da kaa moo. Liak e ku stiah, la ku pakah dii, do da kaa gosa." Pee tu Tuaq Kolatu psuba qeiwaex dii, da silih sepu haix. Pee tu rine egu Tuaq Kolatu nax kepeq. Tuaq Kolatu psubax qeiwaex di, paa da bambakaa, pee tu qeiwaex dii, da hekah! Pee tu Tuaq Kolatu fene, "Sirbodo! Ku polix naq kepeq mahi, tu ka punbodox yako tu qeiwaex naa? Da buux palex kepeq sa moo! E, da heka haix dii!" (Enmalit). Pee tu fen, "Hei! Eta kax polix ka namu kepeq, do ku polix toqi ya naq qeiwae!" (Enmalit). Pee tu Tuaq Kolatu sefen. Sefen, pee tu da bina qei nake ge fina tu nax gebar fene, "Hama rasin la m pakaSirbodo, tu da punbodo kita tirin!" Pee tu du egu rasin, paa du neih tu hamanan pa da kaa. Pee tu riq rasa ii aqa la d mata, pee tu da kastaux nake ina, tu da kastauk e gebar baa di huma di fene, "Kimi jaga la eta yax mata dii, do kim egu buku saa, la kim neih na yax keleq fafaqo, kim egu totox roko la yax nupu. Kim neih na yax mueq naa, la da bafene, la Tuaq Kolatu fen moo tu lae ya banewe." Pee tu riq mata, da badefo ox kadera gos-gosa, pa du egu buku saa, pa du neih pa riq kadan fafan naa. Du egu tabaku roko, paa riq nupuh, pa da bafene. Bu da nupuh moo, tu du baselex baah e, pa da bafene, bu rin mata haix. Pee tu e Tuaq Kolatu fene, "Kim liqa Sirbodo pao, fen da mata haix pi da banewe." Du liqah, fen, "Mo! Geba pao na babaca nax buku! Da banupu nax tabaku." Fen, "Do kim egu rasin di famahi la yako lai elah fene e rasin di empai pi moo! Da pai, do mese Sirbodo mata!" Pee tu da egu rasin di proi pa rine exlaih. Pee tu da sihi dae walegex eeeta e da mata. Pee tu Tuaq Kolatu nax gebar taqi. Pee tu sira fipao toqi taqi tu Sirbodo mata. Pee tu du holun fene, "Untuq sama-sama e! Untuq sama-sama!" Tuaq Kolatu bu da mata, Sirbodo bu da mata, pee tu du untuq sama-sama. Pee tu sepuh! (Transcribed 11/20/87 by Joe Devin, from track 4 of Mukarehet tape 1).