Yos Tomhisa SelwaduJuly 17, 1987 A dohi Anasnaisian. Anasnaisia e e defo eta seih e, pee tu ian iko fen mo tu "Ya ix hama Opo." Ian iko eta da suba geba saa wadu resu ram rua. Da wada resu ram rua dii, paa musun-musun, fulan-fulan e, da bawada polox resu ram rua dii. Anasnaisia suba mahi, pee tu da nikax fene, "Anasnaisia, ka iko fadoo dii?" Fene, "Yako do a defo eta sei kon, paa a ix hama Opo, la da puna selex esnaiq sahex, la a loa geba xkemat. Kita gebado iax fahanam rua, kadanam rua. Ya badefo tu nau snai sia baa, paa a ix hama Opo la da garu selek e snain kahaqo." Pee tu ian iko sleun. Da iko sleun e, da kalax sakix fene, "Anasnaisia, ku saki famahi la a halese kae qei Opo." Pee tu Anasnaisia e sakih. fen, "Ku suba di Opo, do ku dohix la Opo fene yako na dunya do a sala sapan eta ya iko tohon-tohon, ya bapolox resu ram rua naa? Pee tu ku dohix qei Opo fene yax sala sapan na dunya eta resu ram rua naa, ya bawadah polox-polok." Pee tu Anasnaisia an ikoh. Da iko sakix eta da suba ox geba saa bawada eha kaspitux. Fen, "Anasnaisia, ka iko fadoo dii?" Fene, "Yako naa dunya, yax geba snai msian, paa yax fahaqo msian, yax kadaqo msian e, yako oloq bu oloq bisin an baa, paa ya iko hama Opo la da puna selek e snain kahaqo." Pee tu Anasnaisia an di iko sleun. Da iko sleun dii, da kalax sakix, "Anasnaisia e, ku saki famahi la a kaxnaux ka qei Opo. Ku suba sax Opo, do ku bina qei Opo fene yako na dunya, do yax sala sapan eta eha kaspitux naa musun-musun, fulan-fulan e, ya bawadah polox-polox naa? Ya bawada polox-polok e eha kaspitux naa, do ku bina qei Opo fene yax sala sapan, do da xdohix tu kae." Pee tu Anasnaisia an iko. Anasnaisia an e iko sakix eta da suba oto ana fina saa bareqe lai foki snoso. Fina di exnika Anasnaisia fen, "Anasnaisia, ka iko fadoo dii?" Fene, "A ix hama Opo la da garu selex snain kahaqo. Yako badefo tu nau snai sia naa musun-musun, fulan-fulan, fahaq an emsian, kadaq an emsian baa. Ramaq an bu emsian. Oloq an bu bisin an baa." Pee tu Anasnaisia ikoh. Da kalax sakix: "Anasnaisia, ku saki naa la a kaxnauk an qei Opo. Ku suba sax Opo, do ku bina qei Opo fene yax sala sapan na dunya eta yako ha lai foki snoso naa, ya iko musun-musun, fulan-fulan, ya bareqeh? Ya bareqe polox lai fokix snoso naa. Ku dohix la Opo fene yax sala tenix naa, do da xdohix tu kae, la ku oli suba naa, do ku dohik." Pee tu Anasnaisia an ikoh. Anasnaisia an iko eta da suba ox Opo. Da suba ox Opo, pee tu Opo xnikax fene, "Anasnaisia, ka iko fadoo naa?" Fen, "Opo," fene, "Yako an iko naa, a iko hama geb dikax saa moo, tu a iko hama Opo, la d garu selex esnain kahaq. Tu yako pa dunya, do a bedefo tu naq faha msian e, naq kadaq emsian e, ramaqo emsian e, oloq an bu bisin an baa." Pee tu da bina qei Opo gamdii, Opo bina qeih e Anasnaisia fene, "Anasnaisia, ku ramkiso!" Pee tu Anasnaisia di ramkiso, pa eta da katax raman e, da loa geba xkemat. Ian puna ana snai sia tehux mohe,tu ian loa geba xkemax. Sepo Opo da bina qei Anasnaisia an fene, "Anasnaisia, ka namu parluu eta ka suba na la yako, ka suba fina yako haik e, pa ka nam kaparluaq dii yako meqgenapi haix, Anasnaisia. Ku oli beka. Ku oli pa dunya beka, Anasnaisia." Pee tu Anasnaisia an oli. Ian oli eta suba di tohon esnuban, da kalax sakix Anasnaisia fene, "Esi, Anasnaisia, mel geba saa kaxnaux kae hede salax!" Pee tu ian sakih. Fen, "Ehe ta, Opo, geba sa nax kaxnau fi pa dunya naa qei kae." Fene, "Ku saki la ku xdohix. Kae iko sakix la ku xdohix." Ian saki eta ian kerex di Opo Yesus tean fene, "Opo, geba sa kaxnaux yako fene ya suba mahi, yax--ka xnika yako fene, 'Geba snai sia, ka iko fadoo dii?' Fene, 'Ya ix hama Opo la da garu selex snain kahaqo.' 'Ku suba di Opo, do ku bina fene resun e a bawadah naa, do ya te tatix moo musun-musun, fulan-fulan, naa, do yax sala sapan eta e ya te tatix resun na mohe naa?'" Pee tu Opo bina qei Anasnaisia sakix fene, "Ku suba pao geba di dabawada polox-polox resun dii, do ku bina qeih fene rine xnogix hala, da xnogix feten e, rin totoh e, rin exmasa la geba saa kaa moo, tu rin bakaa msika-msikan musun-musun, fulan-fulan e.' Pee tu ku dohix qeih gandi ta. Pe rin tewa xmasa la gebar liho fidi tohon olon, tohon olon, du liho mahi rin tewa xmasa saa la gebar kaa moo, tu rin kaa msika-msikan baa. Ku dohix qeih fene sala di ii ha di tah. Pee tu ian iko sakik. Ian iko sakix eta suba ox tohon esnuban, Opo kalax sakix fen, "Esi, Anasnaisia e, ku saki hede, mel geba saa kaxnaux kae hede salax!" Fen, "Ehe ta, Opooo, geba saa nax kaxnaun an na hede." Fene, "Ku saki famahi la ku xdohix." Da saki, paa da xdohix. "Ku bina qei geba dii da bawada eha kaspitux dii fene rin toto eha musun-musun, fulan-fulan e, gebar suba mahi, rin te nei eha dii poi (proi) la gebar ino moh, tu rin baino msika-msikan eha di. Pa sala ha dihe ii ha di ta. Ku dohix qeih fen sala di ii ha dii e da te egu eha dii la gebar ino moo, tu rin baino emsika-msikan." Dii, da iko sakix. Ian iko suba di tohon esnuban pil-pilik e, Opo kalax sakix fene, "Esi, Anasnaisia e, me gaba sa nax kaxnaun qei kae qei yako hede salak!" Fene, "Ehe ta, Opo, geba sa kaxnau hede. Nax kaxnaun e ma naa hede." Fene, "Kaxnaun di gandoo?" Fene, "Ya iko suba mahi, rin kita ya bakerek e, rine exnika yako fene, 'Anasnaisia, ka iko fadoo dii?' Ya sade rine fene, 'Ya iko hama Opo la da garu selex snaiq sahex di.' Pee tu e da kaxnau fene, 'Ku suba di Opo, do ku bina qei Opo fene ya sala tenix eta musun-musun, fulan-fulan, do ya bareqe lai foki snoso naa lea tau, lea taun e, ya te tatix mahuk e lai foki snoso naa pa rahe moo.'" Pee tu da bina fene, "Ku oli suba pao, do ku bina nax kaxnaun uteh fene lai fokix di da bareqeh dii do geba sa suba, bu rin tewa xmasa la d kaa moo. Gebaro xnika lai dii, bu rin tewa xfilix saa moo, rin te laix geba saa moo. Ku dohix qei geba di ta fene nax sala di ii ha di ta. Da reqe lai foki snoso dii musun-musun, fulan-fulan e, da te neih mahux moo, do nax sala ha di ii ha di ta." Dii, tu Anasnaisia an olih. Anasnaisia oli, oli suba pao dunya, da xdohik e geba dii saa nax kaxnaun e gandi Opo bakaxnaux sakix rine dihe. Da oli sakix di geba kawada eha kaspitux dii, da xdohix Opo nax kaxnaun e sakix gandi e da bakaxnaux dihe. Da oli suba di geba di da bawada resu ram rua dii, da dohix fene e, "Kae e Opo kaxnau sakix fene ka wada resu ram rua dii musun-musun, fulan-fulan, dii, kae exnogi hala, kae exnogi feten, kae exmasa la geba sa kaa moo, tu ka bakaa msika-msikan, pee tu ka nam sala ha di ii ha di. (Transcribed 11/23/87 by Joe DeAnasnaisiain from traack 1 and 2 of Mukarehet tape 2).