Anat Menando By Kakus Liligoli Selwadu October 1992. Fen Anat Menando e Di pulo Wansi Da katax kaiq o Salendaq morin e Selembar laqit o Terguliq-guliq Asal ku dapax kaiq Selendaq morin e Anat Menando o Di Pulo Wanse Da katax kaiq o Selendaq morin o Salembar laqit o Terguliq-guliq asal ku dapax kaiq Selendaq morin e Do An Kasiaq e La sia sopan An Kasiaq o Le bado-doun, do La rin nax ina e Da mata tatax Rin nax amaro Da mata tatax, do La riq bataqi e Le musi-musi Rin bataqi o Do tu pro lale, do Do nax ina e Na roho saki, do Nax amaro Na roho saki, do Fen "An Kasiaq e Le nake xbelen An kasiaq o Le nake xbafan, do Ku bara bele e Le xbate-xbate Bara xbafa e Le xbate-xbate e, la La ku bafaqo, la La ku baliqa, La ku bafuka e Ku fuka peti, la La ku baegu e Le batu tulis, Ku baegu e La ku batulis, tu La ku batulis o Le ate qaan, Ku batahu e Le ate qaan e." Fen, "Anat Menando o, Di Pulo Wanse, Da katax kaiq o Selendaq Morin e Selembar Laqit o Terguliq-guliq, Asal ku dapax kaiq o Selendaq morin e. Ku nota sepuh e Ku tahu sepu, Do ku baiko, la La ku baneih e. Ku nei sandar e Le fidi Nona nax kandeful, do Ku nei sandar e Ku nei sandar e Fil pupan lalen, La d badapax, do Le do da bacah e." Fen, "Anat Menando e, Di Pulo Wanci, Da katax kaiq o Selendaq Morin e Selembar Laqit o Terguliq-guliq, Asal ku dapax kaiq Selendaq morin e." Do Tuaq Raja e Nax anax, Nona, Defo-defo, do Da hefax wae, do Da iko, pa d ba- e lat miri wae, do Da badefo, do Da kita papaq e. Da bafax papaq e, Le papaq tulis, Do da baca e, Da baca tulis e. Da baca ate qaan Di du batulis di, Ate qaan e. Fen, "Anat memnando e, Anat Menando e, Di Pulo Wanse, Da katax kaiq o Selendaq murin o Salembar laqit o Terguliq-guliq asal ku dapax kaiq Selendaq murin, do Da baca sepu, do La da bakerex, Pa d balefak e, Le di nax ate, do Da oli sakik e Le di nax ina, Oli sakik o Le di nax ama, do Da taqi prura e Le resex-resex, Taqi plosa e, Le di nax ama, do Fen, "Nona sopan e, La Nona doun, Ka taqix tenik e, Do haan na?" do Fen, "Inan sian e, Le pei paya, Qaman sian, do Le bere-basax, do Ya bataqi tu Naq ii saa, Bu yako psubah e La kimi moo, tu Ya batewa tu La yako psubah, bu Kim basimpaq e Le sa moo, paa..." Fen, "Ana sopan e, Le Nona doun, Manyasal sapan, do Ku dohix peni, la Ka bara taqi e Le muqe-muqe, Bara taqi o, Le mtoro-mtoro, tu Nam suka sapan e, Le la ku prepa, Nam lalex tenix, do Ku dohix beka, la Ku bar pelbiqo e Le mtoro-mtoro, Bara taqi e, Le emtoro-mtoro ga. Le ku bar pelbiqo e Le emtoro-mtoro, Bara taqi o Le emtoro-mtoro, tu Nam suka sapan e, Do dohix beka, Nam lalex tenix, do Ku dohix beka, la Ma hama qeih, la La ma baegu La qei kae, tu Ka taqi tirin e" Do Nona sopan e, Le Nona doun, Da basgedak o, Do la nax ina fene, "Ya bapsuba e Naq papaq tulis, la Kim babacah e, Ga Qinan sian e. Kirua baca, la La kim batewa, Kim babacah e, Le ate qaan e." Do da sansuba e Nax papaq tulis Pa nax ama e, Le Tuaq Raja, do Da sohix sale e Le pa d babaca, Da babaca e, Le ate qaan e, Fen, "Anat Menando o, Di Pulo Wanse, Da katax kaiq o Selendaq Morin e Selembar Laqit o Terguliq-guliq, Asal ku dapax kaiq o Selendaq morin e." Do nax ama e, Da baca sepuh, do Nax ina e, Da baca sepuh, do Fen, "Ate naa, do Kam tewa qaan, bu Kam tahu turen o, Le emsian moo, tu Le ma babacah e Le baa qaan, bu Ma kita tomah e Le tinan moo," do Do resen, pee tuu Le Tuaq raja da Flali tuba, paa Da kumpul rayat e Da psulux rayat e Nagrii taun Paa da cari-tau e, Le papaq tulis e, Fen san nota e, Le ate qaan, Fen san tahu e, Le ate qaan." do Tuaq Raja e, Da flali tuba, Pa bendar taun o, Takumpul sepo, do Da parisa e Le roit haat, Fen san batulis e Le ate qaan e. San banota e, Le ate qaan, do Da dohix beka, Da fuka beka, la La d baegu e, Le ate toqi, La d bahukeh o, La nona toqi e. Da bahuke e, La Nona sale, La sirua e, Du kaweq toqi, tu Tu Nona da ta e Pelbiqo tirin, Nona da pu e Puxbele tirin e." Do resen, pee tuu Lo roit-haat, do Le du pentofo e Du sopa fatano, Do rese-resen, do Fen, "Kuraq sane o, Baelen hede Ba na tu na e, Nagrii taun e?" Fen, "Sisa selek o, Le Raja Muda, Tem da taga leuk o, Le na mohede,do Da ulaq tuba e, Le lalen sian, Do Raja Muda e, Da taga selex, do La da banika e, La Raja Muda fen, "San batulis e Le ate qaan e?" Do Raja Muda e, Da sohi sade fen, "ya banota e Le ate qaan." Do Tuaq Raja e La da baputus fen, "Ka batulis papan o Tu ate qaan, do Ku egu tinan, la Ku xdueh beka La Nona psamix, la Da bara taqi, la La ka pahuk e La Nona toqi, Do kirua e Le kaweq toqi, ga." Do resex, pee tuu Le Raja Muda, Cinta sopan, do Le da manyimpaq e. Manimpaq niwero Le karoq-karoq, Manimpaq hasel e, Le tu warahe, paa Da kalaaro (Dutch klaar) Pa la d bafaler pa nax waga, paa La da ix sopa e. Da sopa hama e Le hama ate Na baqaan e La Pul Manado, pi La Pulo Wanse e Le Pul Manado, Hama atero Le na baqaan, do Do resen, pee tuu Le An Kasiaq, Sio sopan e, Fen Raja Muda, do Ka sopa dii, do Ya hai toqi, La puna kokiro Le tu mamasa, la Ya bamasa e Do la ku kaa, tahix kofiro Do la ku ino, ga." Fen, "An Kasiaq e, Ku oli beka, la Ku manyimpaq, la La ma basopa, tu Sopa hama e, Le hama ate Na baqaan e La m sopa hamah e." Do An Kasiaq e, Da oli saki, Pa d manyimpaq e, Le nax pakeaq, paa Da fuka di na e La di nax peti, Pa d baegu e Do pisur boti tu Tu da egu e Le kepeq maas, Pa d babuqkus e Di nax pakeaq e. Paa da babuqkus e Le memo-memo, Da batahuh e Le memo-memo, do Fen, "Raja Muda, do Le kita rua Ma basopa e Di Pulo Wanse e, Ma sopa suba e Di Pulo Wanse, Ma sopa sakik o, Di Pul Manado, ga." Do resen, pee tuu Sirua keha di Raja Muda e Do tu nax waga, paa Le tor fi tanjoq e Le bata tanjoq, Tor fi leoq o Balihu leoq, paa La eta suba e Di Pul Manado, Eta suba e Di Pulo Wanse, do Eta kaduk e Di Pulo Wanse, Da baxnika la La An Kasian, do Ka toho toqi e Da rahen moo, pi Ka badefo e Le jaga wagaro." Le An Kasiaq e Da sohi sade Raja Muda fene, "La ya badefo, tu Ya defo jaga e La jaga waga, La a tahix kofiro, Ya papu hala, tu Ka batoho e, Da Pulo Wanse la Ku bahamah e Do hama atero." Do resex, pee tuu Le Raja Muda Da batoho e Do fa da rahen, paa Paa ta fil toko e Da oso toko, Ta fil tokoro Le nika toko, fene, "Do toko ate e Le na baqaan, do Du toko rine e Le naa pi moo?" Do Da xnika tokoro Le tokor polo Geran rua, bu Da dufah moo, tu Fen, "Kami preqeh e Le ate qaan, bu Kam kita salak e Le tinan moo, do Kam toko salak e Le saa moo, Kam tahu salak e Le saa moo, do Raja Muda e, Da oli sakix gam- da nax wagaro Da An Kasian. Do Fen, "An Kasiaq e, La cinta sopan, Tahix kofiro Do la m baino, tu Ma sopa tehuk e La Pul Manado, Ma iko tehuk o La Pul Manado, tu Ma dufa atero Na ba na moo, Ma tewa atero Na ba na moo." Do Sirua ino e, Du ino kofi, Tu du kaa e Du kaa sepo, do Do du pker kupero Le du pker laa, Paa tor fil tanjoq Le bata tanjoq e. Pa tor fil leoqo Le lihu leo, Paa tor fil nagrii o Le laqgar nagrii, do La eta kaduk e Di Pul Manado, Eta suba o, Di Pul Manado, do Fen, "An Kasiaq e, La cinta sopan, Ka toho toqi e, Le aki moo." do Le An Kasiaq e Da sohi sade fen, "Raja Muda e, Ma toho sepo, tu Sei yako e Na waga lalen, pa Ya toho toqi, la A ptomi baa e, La ya baptomi tu Le ana skolar, Ya baptomi o Le baal pee." Tu (Dutch baal) Le Raja Muda e, Sirua toho, paa Du fi da-e Le Pul Manado, do Fen, "An Kasian, do Ku ptomi baal, Bara ptomi o Le jahax-jahat, tu Tu ya oso e Le oso tokor la yako xnika e Le dagan-dagan e." Do resen, pee tu Le An Kasian, Riqe eptomi o Tu ana skolaro. Da ptomi eta e Du ptomi sepo, Do sir pexduan e, Do fa dae wae, do Ma iko la m ba e Le la m bafoi Fi da wae o Le Pul Manado, do Sir iko kaduk e Da wae exnoho, Pul Manodo, do Le do sir foi, do Du foi eta e Du foi sepo, Do ana skolaro Ba oli leuk e. Le An Kasian, do Le rin bakerex tu tu Nax pakeaqo Pa d pake tukar e. Paa da basaliq o Basaliq sepo Da dihix olon e Le emribe-mribe, paa Da bapebe e Nax pisur boti Manu raman tu Nax kepeq maas e. Fen, "Lae qinan o Le la bareqa, Lae Qaman e Le da bareqa, do Da reqa ate e Le di baqaan ma Dae Tuaq Raja e Le Raja Jiqi e, Da Pul Manado e Manado olon, da Wae Puloro Do Pul Manado, do. Fen, "Ku sela e Fil faha xwana Eta kaduk e Le da kir gilax, do Ku aqax tandaro Sa baa dii, do Ku psubah e Le kepeq maas, la Ku bareka e Le tu pi sura tu Raja Jiqi e Da fuka tok e Tu Raja Jiqi e, Da fuka sufen tu Da toko atero Di turen rua, do Filin dikat e Le haa sa moo, tu filin baa e Le kepeq maas e. Filin hasel o Le haa sa moo, tu Filin baa e Le pisur boti, do Tu Raja Jiqi e Nax suka di ta, Raja jiqi o Nax lalex di ta, ga. Do resex, pee tuu Le An Kasiaq, Da bapsuba e Le pisur boti, do Pa d barekah e Tu kepeq maas, pa Wanan Tifo e, Do da wan lolox, do Raja Jiqi e Da fuka toko, Raja jiqiro Da fuka sufen o. Fen, "An Kasiaq e Parluu tenix, An Kasiaq e, Nam masux sapa-an e? Ka name parluu, do Ya tewa haix Ka nam masux, do Ya tewa leuk e, Tu nam ina suba e Le fi na yako, nam Ama suba e Le fi na yako, do Ka haji qei e Le qei ate fi na yako, do Ya toko rua-a, bu Ka kadux haix, paa Ka suba haix, tu Ate filin e Le pisur boti-i, pi Kae kadux haix tu Le kepeq maas, Do ku egu atero Le ha na sahet e. Ku sohi sale o Le tu nax liex Ku sohix sale e Le tu nax pantoq naa. La ku bakatax, do Ku puna nax liex, Ku balafa, do Ku puna nax pantoq e." Fen, "Anat Menando e, Di pulo Wanse, Da katax kaiq o Selendaq morin o Salembar Laqit o Terguliq-guliq Asal ku dapax kaiq Selendaq murin o." Do Raja Jiqi e, Dapsuba ate di, pa D bagatal e Le emhewa-mhewax, do Babuqa alaq e Le rupa-rupa, Bakilax alaq e Le rupa-rupa, do Do lae filan e Le basisnain, Lae filan o Le balelaen o. Fen, "An Kasiaq e Ma lekuh beka, La m baneih e, Do tu nax elet e." Da pele netat o, Le netax kasen, Pa d batedak e Le tedax atero. Da sqebeh sakix tu Le tu bas miten, La filan bara e Lelaen beka, mel Mel Raja Muda e Da dapa-tao, do Da xmata riqe e Do la d baegu e, Tu Raja Muda e Da sopa hamah, Bu da kita mtaik e Do saa moo, do Le Raja Jiqi e, La da kaxnau An Kasiaq e, "Ku oli tuhah, do Ku nei lefak e Pa waga fohin, La ku tutuh e Tu papan eqan e. Ku oli sakik e, La waham sakix, do Ku bara bafa e Bara bafax sakix, tu Ya naq koin e Le tu ax dii, Bam ku bara aqak e La mori moo, tu Ku iko eta e Ku sub nagrii, tem Ku aqax sakik e, Le dii do bole, ga." Do An Kasiaq e Da sgege emnakun di nax atero, Da oli sakix, do La eta kaduk e Do la nagrii, pa D bakehah e La waga lalen e Da nei nosak e Pa waga fohin, Tahu nosak e Pa waga fohin, paa Da tutu xrapek o Tu papan eqan Ma pa wagaro, Le waga lalen e. Do Raja Muda e, Da oli kadux, Raja Mudaro, Da oli suba, do Fen, "An Kasiaq e, Ku tahix kofi, An kasiaq o, Ku papu hala, tu Do la m baino e Tu la m bakaa, La m sopa oli o, Ma oli sakix, tu Ya xnika atero Le na walegex, Bu ya dufa toma e Le saa moo, tu Ma sopa oli e, La m oli-oli, Ma iko holik oLa m sopa oli, ga Do An Kasian, do Da tahix kofi, Da papu halaro, Le wae mano, paa Sirua ino e Le tu du kaa. Du kaa sepo, do Le du pker kupe e. Du pker kupe o, Le du pker laa, Du fale jaqkar e, Do pa du iko, do Le tor fil tanjoq o Le bata tanjoq, Tor fil leoq e, Balihu leoq e. Tor fil nagrii e, Do laqgar nagrii, Tor fil tanjoq o, Le laqgar tanjoq o. Do eta kaduk e, Di Pulo Wanse, Eta suba o, Di Pulo Wanse, do Du laqgar sakik e, Fil Pulo wanse, do An Kasian, do Da wene aten e. Eta suba e, Di Pulo Wanse, Eta kaduk o, Di Pulo Wanse, do Du dofo sakik e Fil Pulo Wanse, Oli sakik o, Le qei nun elex, do Le An Kasiaq e, Bawene ate Ha di qaan e Da wanu taga, do Fen, "Anat Menando e, Di Pulo Wanse, Da katax kaiq o Salendaq murin e Selembar laqit o Terguliq-guliq Asal ku dapax kaiq Selendaq murin." Do Do Raja Muda e, Bapre beta, Raja Mudaro Bapreqe naix, do Fen, "An Kasiaq e, Ku dufa ate ha na Salax, do Le do ku eguh, la Ya batukar e Tu toko taun, Ya batukar tu Naq waga taun e. Le An Kasiaq e, Ka dufa salax, Do ku tukeh, moo do Ya mdao kae, tu Ya fage kae e Le fapao masin, Tatax kae, do Do fapao masin." Tu Le An Kasiaq e, Da mtako nmata, Do da xdue o, Le tu nax ate, paa Raja Muda e, Da sohi sale, Raja Muda e, Da egu pekax, paa Da oli tuhah e, Le eta kadux Da nagrii, do Le tuba teden e. Le Tuaq Raja e, Da flali tuba pa Fina mhana e Le bendar taun, do Takumpul sepo e, Le miti-miti, Du psulun sepo, paa Le tu du saksi o Le Tuaq Raja e Le da putusaq Nona kaweq o Tu Raja Muda, do Do Raja Muda e, Da huke ate, paa Nona saleh o, Tu mnakun kasen, do Da sleda mhunak e Le mhuna ate, bu Da moho toma e Pa meja moo, do Du gogo atero Di lea tau kemax- Kemax, bu Le egledax moo. Do Tuaq Raja e, Le da baxnika fen, "Raja Muda, do Ka egu ate o, Ka egu ate oNa fidi sane? Ka sale atero Le na fil sane, do Ku baprepax la La geba duan Da bakaduk e Do la d basledak e." Fen ya baeguh e Fil An Kasiaq, Ya basaleh o Fil An Kasian." Do Fen, "Kimi mhara e Le An Kasiaq, La d bakaduk e, Do la da sledak e." Do resex, pee tuu Le du ix qei An Kasiaq, paa Paa da bakadux, do Lae Nonaro Le da basgeda fen, "Ate duan e Di An Kasian, do Le An Kasiaq e Baxdue ate, Do ya bakaweqo, Tu An Kasiaq e." Le Tuaq Raja e Da keputusaq tu Ate dii, do Le "An Kasiaq eKu kata ate, la La Nona psamix, Do ka bakaweq o, Le di tu nonaro." Do resen, pee tuu Le An Kasiaq da basgedak e, Le dii la Nona, do Ku tutu mejaro, Le tu pantutu, La m basledak e, Ma sledax atero." Le da basledak e, Do lale psian Da baptaho e, Le di pa meja, do Fen, "Anat Menandoe Di Pulo Wanse, Da katax kaiq o Selendaq Murin e Selembar laqit o Terguliq-guliq Asal ku dapax kaiqq Selendaq murin, do Do ate di gatal o Le mhewa-mhewa, Pa d babuqa alaq e, Le rupa-rupa, do Do filan leo e Le bu da leo, do Filan hai o, Le da sisnain e. Do resex, pee tu Le Nona sohi Pa d basaleh e, Le tu da xdueh, do Le Tuaq Raja e Le da basgeda fen, "Hulun beka, tu Tu Nona kaweq e! Le loa ramen o Le rame beka, tu An Kasiaq e Tu Nona kaweq e!" Sirua kaweq, paa Du loa ramen Beton pito e, Le reden pito, do Le Tuaq Raja e Fen, "An Kasiaq Kae eprenta, tu Tu raja sakix, tu Le yako mkeda e Le mkeda haix, Paa kae eprenta e, Tu raja sakik e."