Miqgus Tomhisa Selwadu July 13, 1987 8:53 A M A dohi geba bohox tu Selawae tu Manuwae. Sirua naa iko, paa du tane suran. Nax kae fene, "Ku liqa surano dae, tu ya badefo." Fene, "Ya badefo, tu ku liqa suran." Suba dae, geba bohox naa eplatan tu nax kai haix. Eplatan, siru psisan eta-teta-teta-tetaa siru eplapa psaman. Sira fen, "Supan teme ma saki." Pee tu nax tau badefo, pee tu sakix pee tu nax roko iko, paa da platan tu geba bohox dii. Platan eta-teta-teta-tetaa glapa psamakoro, fene, "Peka la supan teme kita ro sakix." Supan sirua iko sepo, paa da lefak e Manuwae di kau lahin defan. Pee tu sirua nax kai psisan. Psisan tu platax eta sepo, pee tu du klapa psamano, pee tu Manuwae taga, paa da lata geba bohox naa. Da sasa pesnai sepu boti-boti, paa du ptaqax fahan-kadan boli neten dii. Paa sirua oli falawe, paa du riux, du wesi,. Pee tu sepuh. (Transcribed from track 2 of Selwadu boys tape). Miqgus Tomhisa Selwadu July 13, 1987 A dohi kam iko aki Wabaha. Kam ix egu minya. Kam suba aki, geba sa qaan Ber sirua Haan egu warian. Du egu warian, pao motor la du priri aki ptiga-ptiga. Suba aki, gebar di pinda haix. Pinda haix, pee tu kami kaa warian oto kalodi lahin. Kami kaa sepo wariano dii, kami egu minya. Kam egu minya, paa kam oli bage di wae sa qaan Ajawa. Pee tu kami haka gos-gosa nami botolo, nam segeeno baa dii, paa kami e lebaro. supax-supax pee tu kami iko. Kami iko, paa kam deax oto kandeax sa qaan Geren Saksia. Pee tu kami kaa nami maqkaor baa dii, tu tenu skehanami, pee tu kami inu wae. Oo, skele kami mo do kami mata haix dii! Bu kami inu wae, paa da fag podox faax lale. Pee tu kami leba ior dii, paa kam oli. Kam oli suba na Wamite, gebaro safe kam nam minya tanaro. Safe tu pirin. Paa kam oli tuhar faaki, kam kehax waga, suba aki, pee tu kami e lepa fasaka huma. Kami lepa, paa suba saka, pee tu kam deax tu minya tanah dii. Pee tu kam werix lefako. Kam emtako mele gebar laha. Pee tu kami tako. Pee tu kam lefa minya tana dii, pemkanar pexbate! Kami fadakor moo. Pee tu kami iko eta suba hum fena, pee tu kam bage. Bage eta supan, fene, "Ma ix egu pi-pili minya tana!" Kam dohi warian, paa kam iko pil-pilik. Iko eta suba aki e neten sa qaan e Wabaha. Kam iko eta suba ox Wabaha, pee tu e kam ix minya tana fidii tiga-tiga. Kam egu minya tana fidii tiga-tiga, paa kami soli oto sergeen. Sergeen, pee tu kami iko. Kam iko, paa kami e leba minya tana dii, paa kami hakar, paa kam oli. Kam oli sakix. Dii, kam deax pil-pilix neten sa qaan Geren Saksia. Paa kami kaa nam maqkaoro, tu obix, tu kofot, tu warahe, tu hosi, tu e sapan hede--bau e!--tu ikan, paa kami--e kasbi seha toqi. Kasbi sehan, kam tedakoro pa xnaano gosa. Kami campur tu warahe. Paa kam oli suba wamiten. Gareja, pee tu kami suba di Wamiten, kami kfilik minya tanar dii. Suba sakix Wamamboli, gebar oso sepu gareja haix. Pee tu kami eptea di huma. Kami iko mohe. Kami eptea di huma, paa kami bajaga. Gebar suba fidi gareja, pee tu kam fixdii ute la hawar. Suba la hawa, geba sa tehux lawe mohe. Suba sakix lawe esnaba, waga sa tehux mohe. Pee tu kami reka kau lahin. Teda lahin. "Toq-toq-toq-toq-toq-toq-toq!" Pee tu kam bafax faaki, waga sa fixaki famahi. Da sai rohox-rohok. Pee tu kami jaga, paa kami keha. Keha, paa kami sai suba aki, reka waga hoson qei emloko. "Toq-toq-toq-toq-toq-toq-toq-toq!" Paa du rusa fofo, paa du seka saa. Emloko uka ruat. Paa kami epsamax futin-futin. Paa kami oli suba sax huma, paa kam kaa. Kami tedax namix. Bleka tu uta madet. Uta xlamat. Uta paku. Uta kada xroket. Uta kikin. Uta sapin. Pee tu sepu haix dii. (Transcribed 11/12/87, by Joe Devin, from track 2 of Selwadu boys tape). Miqgus Tomhisa Selwadu July 13, 1987 A dohi kami finaa fasa ua. Suba pao, yako defo polox kiri. pee tu kami xmata fafu saa. Pee tu kami loma fukan saka wae sa qaan Marluhu. Peetu kami lomak, pee tu kami emtako gebaro, pee tu kam loso dae nex menet. Paa kami loma fidae,pee tu kam oli, paa kam tenuk lawe masi. Paa kami lomax sepu, pee tu kam oli, pee tu yako fasaka. A iix lemoq, pa a fasa ua. A fasa ua, pee tu motor lea kami namir. Pee tu kami suba pao, kami tarik fadae, paa kami iko. Paa kami nam taor dae, du ukur seporo, pee tu Om Edu da ukur kam namiro, pee tu kmai oli kadax sakixdii fasaka. Paa kam tila masin, tu air pono. Paa kam iko sakix fixdii ute saka e Waubura. Paa kami iko fixdii ute samax Wabura, paa kami xmasa, paa kam kaa. Kirin hama nax ama roix dii emlapa, tu da mtai-mtai mo. Kami oli toqi bu kami emtai-mtai mo. Paa kami sup-supan pee tu Bapa Guru fene, "E supan do kim oli la kimi taga skola. Mo doo dapax kim sale nim buku lapoot moo. Pee tu kam oli, paa kami sale nam buku rapooto, pee tu kam oli sakix, pa kam logo pil-pilik. Kam logo eta suba pao, pee tu kami e defo pao, paa kam finaa logox asu***** kehax sakix motor paxgilin aan dii. Motor botit aan di. Paa kam suba pao, paa kete omba do ka kabah hede? Sarakan***** empein fen, "Mou! Mou! Tu yako moo." (Transcribed from track 2 of Selwadu boys tape, by Joe Devin, 11/12/87). Miqgus Tomhisa Selwadu July 12, 1987 Qama qaan nani. Qina qaan Mukaciin. Yako naq wai gebar telo: Sa qaan Nopel, sa qaan Semol, sa qaan Mukabesi. Yako, pa kam paa. Naq opo, fina emtua rama xbohon. Naq meme gebar paa: sa iko fapao Buru selataq, i har telo badefo tu yako naq nene. Naq nene geba mpeix. Yako geba skola. Qama tatix yako. Karna yako fidae kaa ikaq mujair. Pe tu yako toho skola ba naa. Pe tu yax defo emsikan tu qopo, fina emtua rama xbohon. Kam rua bage emsikan fi na Selwadu. Yako sgela maqkau sehan leqina, pa a kaa. Baten ibu gur sapan kaa. E Dois naa mamba xmata minjaqan sa leqina, pa d sisih haix, pa da bage gebar leqina. (Another voice now says, "Kami safex tu raran.") Kami safex tu rara rua. Kami, Qama egu kadan saa, pa kami kaa haix aqa. Kam kaa tu bia., la kami uhan. Pa kam kaa haix aqa. Peni la a sohik e geba fipao suba, la kami kaa haix dih. Tu yako badefo eta sei kon haix, tu nene. Pa a defo emsika-msikan. Qopo kalax ute wae. Yako emtako tu fina emtua xdoman, pe tu yako egu wae mo. Yako iko peskorik. Ya egu wae ute riqe mo. La kalo riqe stei di, yax lehex nax ior. Yako emgihi mo. Karna yako, a raqi "nene" la riqe. Riqe stefo, yax leher. Riqe stei, a leher. Yako emgihi mo, karna qina dae ebreman. Qina na yako. Pe tu sepu haix dih. Miqgus Tomhisa Selwadu July 12, 1987 Tegrihit. Yako la a dohi tegrihit. Waktu nakan fuan, kami flali tegrihit. Nagrir gerano di kaa tegrihix mo. Kami kaa tegrihit. Ana roi-roir an di nunu eplakar toqi. Kami geba mnegar bu gamdih e. Kami flali tegrihix, pa kam kaa tu bia. Hala sa baptea bu kam kaah mo, tu kam pekah, kam iko taga tegrihix fidae kaku di hede. Kami, ermede, pe tu kam iko hapu lakax, pa kami jaga. Tegrihix tifo, pe tu kami flali tu nax palu-palu oto, pa kami kaa. Eta sup-supan dii, kami iko pao Rana. Kam hama ikan tu emloko. Eta modan, kam sakix fadae, pa kam qei tegrihix, pa kam kaa. Kam kaa, Yusak da egu lakax, pa da flali tu lakax eta duda sepu lakat e, pe tu da jaga tu uka mafuu. Da flali tu uka mafuu pao, du moho pao rahe. (Another voice, "Du kaa ikan da di toqi faan boho tirin!") Ikano dii faan boho, tu da midi bu laga xboho-xbohot. Da midi pao gokox fohin. (Another voice: "Du bahama alamax dii, gebar pila, la du papuh pao la du kaah! Eta du kaah, la du plabax rohin, gebar pila, pa i ha ba...!" Tu tegrihit e kami flalix tu lakat e. Kam wailak e tegrihix di. Kami paha tu uka fuan, pa bregax sepu wapun. Yusak tu Tonis na nunu plaka dikax. Yako nau plaka dikax. . Feni nake eplaka pee. Yana nake eplaka pee. Kami nami eplakaro hansiak. Fina exgalix sa bu nake eplaka. Fina ha ii an sa bu nake eplaka. Kami jaga mene-mene. Fina tinanato di baba nun anato, pa du flali tegrihit. Kami bajaga. Kami ma jaga tegrihix di, pa kami flali, tu "korqaa-korqaa-korqaa-korqaa" (9 times ending in "korqaar!"). Miqgus Tomhisa Selwadu July 12, 1987 A dohi kam iko fixdae famahi. Kami bage di Garan. Kami bage, pe tu ebridin tirin, yako seduk oto naq ate. A bage, a bridi eta a pepax ban haat. Pa a iko. A iko dii, fato toma sepo kadaq boti-boti. Pa a iko. Kam bage fixdae famahi eta suba naa, yako kadaq mpei sepuh. Kadaq peih boti-boti! A bage eta hosak e, pei sepu kadaq boti-boti. Dobok. Yako bage eta beto tifun, pe tu kam famahi. Kami kehax oto. Kam kehax oto, pe tu kam kehax Niko. Niko nax oto. Niko nax oto, pe tu da tatix kami pao asrama. Pe tu kam famahi. Kami bage, pa kam suba naa, lea tifun haik. Kam iko eta suba naa, pa du frogox yako pa yako skola. Yako, Bapa Guru Nyoq fene, "Skola pao, tu nam pakeaq sa moo, bu bole." Pe tu riq baliqwai-liqwaik e, riqe fene, "Pakeaq sa moo. Oli, oli, oli, oli!" Pe tu yako oli Pe tu Bapa Guru Abuut, pe tu da skola kami. Tuan fixdii gosa. Yako naq suka riqe. Kami skola eta kami ulaqan haix. Yako, ***** sir ix tatax sepu yako e, yako badefo emsikan tu qopo.. Yako taqi baa-baax tu qopo. Qopo siux yako tu wae, bu yako mo, tu xdoman. Yako mtako. Paa sepo di tah!