Kami fidae, do kam hae eta musun polo geran emsian pi polo geran rua pii, do kam nam geba mtuato do sira musi usaha. Du usaha hama geba tukaq di la qei nun anato. Moo, do mam du usaha mooh, ramax tu nunu rokoro. Nunu geba mtua gerano sira fene, "Ka mkua fi di? Nam anato haa la bahaa, do kae tewa pisu nunu behan di moo? Nun fatu di?" Pee tuu kam nam geba mtuax musti usaha la pisu behan di i ha naa. Behan ha naa, anax musi da toho wae naa. Pee tuu geba mtuax musi da hama tukaq. Hama tukaq mahede dii, musi da iko keha pii, da hama tepux sa pii, la qei tukaq. Pee tuu da dufa tukaq haik e, atau tukaq baa negri lalen, da kastau tukaq. Tukaq erux, ramax tuu riqe prepa la kain fene, "Supan, do kim hai tu tukaq na gamdae wae." Poo kami bu kam tewa haix toqi, bu kalo kami geba laga hai, musun polo geran dii eta kam tewa haix fen o, berarti ha naa la qei toho wae. Jadi kami fidi huma dii, poo kam hewak e ieqan, tewa ate la kam jaga geb tatik, tu kami fidae do eta kami ana mhanaro, do musi kam toho wae. Moo do kam midi tu nam rokor, do kam nam rokoro iix kami fene, "Ka toho wae mo la tenik e? Ku maraka?" Eta moo, do kami la kam bahaax-bahaax, mama kam gamnaa kam nam umur eta dena di musun polo geran nee pii musun polo geran pito, la umur yaq du prepa fene... Finaa, finaa do umur fene "umur pacaran" dii, fidae do kami nam umur di ta, do eta toho wae mahade poo ramax tuu anafinaro sira mgihix kami. Bergaul tu anafinaro, bu ma midi tu anafinaro, bu sira mgihix kami. Fene, "Yax midi tu kae moo, tuu kae do ha gamdi... Kae namu gamna olox tian hede." Fen "olox tian" naa, do fene da bafoki sueh. Pee tu sira midix kami gamdi ta. Pee tuu kami mhana kami mgea. Musi hama tukaq la musi toho wae. Jadi eta geba dii nax ama mata tatak e waktu masi roin-roin e, paa umur polo geran rua pi polo geran telo, paa geba saa da urus moo, do nax kai rahex. Bu eta nax kai sa mahede, do riqe haax la da bahaax, riqe sendiri musi da urus emhewak, la da urus hama tukaq emhewax la riqe fen riqe la toho wae. Ana mhana do ramax tuu trowahero paa pii, trowaher lima pii, eprede-predex poo ana mhanaro dii iko di tukaq pa du tolo tukaq. Pee tuu du iko. Iko suba pao wae, musi du tehex nun kataro hansiak, pee tuu geba-geba da ptedo oto liku-liku. Gamna saa pteno ma la liku naa naa, saa kahan lawek e, saa kahan daek e, saa kahan daek e, saa kahan daek e; jadi saa kita nax roko moo. Moo, si bara saa bara kita nax roko moo. Pee tuu ramax tu tukaq dii, da molae filawe selak. Iko suba dii, paa da egu mokin omon, pee tuu da prepa pa geba rihax fi pao wae, teme da egu unut, paa riq karjaa. Da karja sepo dii, riqe egu ii sa qaan balut. Balux naa, do ma dapax fidi bifolo. Ramax tu ma dahi bifolo teme ma dapax nax balux na ta. La tahu bex-beta baa dii kawa ha di tukaq baiix laqina diih, la bara rahana moo. Bu ramax tuu fidae do mama geba dii mama da walfina haik e, do musi da dohi la tukaq. Moo do ramax tuu sala riqe emhewak, tu ramax tu ri nax ii dii da bhagen pii, bu geba dii mama riqe walfina mahede, do moox. Cuma nax ii sa moox, tu biasa rahex. Asa geba walfina haix, do asa xdohix la tukaq, la tukaq biluh. Ramax tu eta riq walfina haik e, do musi da dohik la tukaq dii. Eta da dohix la tukaq mooh, do watix riqe, tu nax ii dii rahan. Bu eta da xdohix la tukaq, la ramax tukaq biluh tu mokin omon, do moox. Rahan moox. Eta geba dii da walfina mahede, do bole, tu nakek e ii sa mohe-mohe. Pee tu tukaq baiko selax-selax filawe eta gebar pila sa dii hansiax gamdiih e. Bu kita fidi huma, do kita musi ma egu ieqan saa, tu ieqa haax saa la m pifak e ieqa roix saa la ma helux. Pee tu kita temax kata mahede. Kita tu iwagun. Tapix baa iwagun. Bu mama geba dii mama fene riqe walfina mahede, paa riq nake ii dii mpei moo, pa rahan moo, do sepu do ma temax kata bu bole. Bu geba dii fen nake empei, pi nakex rahan, do da temax baa wagun. Tapix baa wagun. Selama miqgo lalen pii, miqgo lalen geran pii, elen baa ax huma lalen. Dii fidae diih, la ana mhana toho wae diih. Ramax tuu kita oli dii, poo kita nan ama riqe siap haik e tepux sa pii fafu sa pii, bu bal-balax do bole tu fafu, bu tu naa po mohex. Ii sa haan fafu di moox. Paliq-paliq geba msian teput emsia-msian. Tepux moo, po hama tonal. Tonal faten rua-rua pi telo-telo pii, paa xmasa pa tukaq kaah. Laix tukaq tu geran, pee tuu gerano dii xmasax la kita kaah. Pee tuu sepoh. Buruq di olon i haq naah, po unux di pa kita nohax unux di ha gamaqnaah, parsiis di buruq di okon dii, pee tuu katanan, pa kita fakah baa naa. Pee tuu fakah sape i fax beta unux pao. Bu bara fax telax hansiak e buruq di okon moo. Kastanda rahek e. Yaq pentiiq kawah. Kawa la defuh eta suba pa unu. Ramax tu buruq di isin ma pa ax lale naah, tu da harah tu unux fisaka. Pee tu egu balux pa tahu saka ox kawax diih. Pee tuu buruq dii, iix pa d... Faleh pa d paas di kita fukanan saka, paa helux sueh tu pifa. Tabax sax fukanan, pee tuu hapu sueh tu pifa. Gamdi rahex. Yan punah di Lian. Emrimu Saleki puna tukaq. The rationale for male circumcision is that without circumcision the penis will become unclean and stink, repelling women by its odor. Gamdii pe bu anafina gamdiih e. Ana fina dena di umur polo pii polo geran emsian, poo nax ina musi da urus la qei tukaq anafina gamdiih e. Tu musi da toho wae. Eta moo, do riqe haax la da bahaax la da toho wae mahede, la da midi tuu nax roko ana mhanar la midi laga xboho-xbohot e, kam meme jaga dehe-dehe gamna midi pirakan pii midi pimaun pii, poo ana mhana di fen, "Moox! Yax mau kae moo tu yax midi kae moo, me kae lali yako. Me kae lege yako." Dii poo anafina mgea. Anafina dii emgea fen, "Oo, mele tu ya naq ii naa fotoh mahede ye da rema." Padahal ii saa la da legeh moo, bu dii do muqkin karna geba mtuato prepax ii di haix fene ii di rema pii. Pee tuu sira mgea. Hama tukaq la fotoh.