ENLEFA.

Enlefa naa do i ha rua.  Enlefa saa la ma rog qei ana fina, do ma lefah.
Ma kaba ana fina di qaan, ma kaba nax geba mtuato qaan, pee tuu ma fag
tiqgau huma dii, pee tuu ma rogo dae paa ma tolo ana fina diih.  Nax ina
tu nax ama tu nax wair tu nax gebar gerano babage, bu du tewa moox.  Kita
rogo dae lale haix.  Kita dae lale tem kita toloh.  Ma puna jahax-jahax
saa do bisah.  Eta jahax moo, paa mama fen la ma rog qeih la ma heka tuha
la m kaweq, e rogo dae la ku barogo ledax-ledax dae la toloh la manyimpaq
ior la kim heka.  Enlefa saa di ta.

I ha saa do da boho.  Saa do ku hati sakix nam roko saa, do ku kaba nax
liex, pee tuu ku batahu di tohon.  Tahu di tohon dii, pee tuu ramax tu riq
basqoi-sqoix baa geba di ka bakabah dii.  Ka basiux fene jaga geba ha q
naa nah.  Pee tuu geba gerano baiko dii, bu du betax moo.  Ramax eta geba
di ka bakabah qaan, ka pinaux enlefax dii, suba dii tem da betax.

Gebaro fi dae, do du tahu di tohon, pi du tahu di huma saxmena pii, la riq
qei nun rokoro, pee tuu nun rokoro betax, pee tuu ramax tu gamahik e gebar
tewa fen, "Oo, i ha naa enlefa na ta.  Kawa sabaraq na moo, tu naa do
enlefa."  Tuu gebaro du plulih, pee tuu da gosa.

Enlefa naa, do du werik e i har telo.  Du werix tepux telun e, do ramax tu
da poda bex-bex-beta oto kita nani biji kaliir dih, pa da haa bex-beta baa
di ta.  Eta du werix fatu, do ramax tu da timbul bex-beta baa di kita
kebanan, moo do kadan tianani.  Eta du werix weta, do du safe weta
feh-fehux fi lawe toko.  Musi isin pito.  Pee tuu du hapuh tu benaaq, pee
tuu du werix di tohon, pee tu du pinaux enlefa di fene, "O!  Iqax tu ka
iri rama!  Ku bara iix sabaraq-sabaraq geb dikax moo, tu ku sohix eta geba
naa (nun geba du bahatisaki dih) teme ku xgosa-xgosa geba na ta."  Pee tuu
ramax tu eta weta, do ku aqax tu da poda bex-bex-beta baa di kadanan pii,
kebanan pii, da puna  enpei emtaex pii, paa ku tewa fen neteno dii do mefu
sepu boti-boti.  Dii weta di.