Esnara do gebaro nunu nete pusaka pii du safe fidi geba pii.  Gamna yako
pa naq nete pusaka sa da wahiba pii.  Nete pusaka do nete fidi nin geba
mtua bal-balax kaduk, paa enreqan fidi geba haax dii eta skaraq dueh eta
gugat neen di mooh.  Eta geba di safeh e...  Moox!  Da te silih bu da sili
emtaix moo.  Kalo yax reqah la da jaga rahex do bisa.  Riqe la da jagah e,
riqe la da hapo, bisa; tapi da te safeh moo.  Da safeh la da safeh do da
safe emtaix moo, tuu ramax tuu geba-geba nake esnara-snara pee.

Pii gamna ka toho haix, paa ka kaweq tu geba sa nax anat e, pee tuu ka
sili harta tu harta, pee tuu geba di, amkete tobon dii yaq nax anat emhuka
dii, da huke neten sa la kae, nake emsawan di, ha di kae fen rahe emhuka.
Exdemen dae Buru toqi, esnara-snara gam di ta yaq riq neten di moo, nax
nete pusaka di moo, bu riq dapax fidi nax amkete.  Ada fidae Buru

.La fidae la esnara sakix la geba-geba nake esnara-snara dii, do geba nax
neten e, geba sa berani kaa nax roko nax neten moo.  Eta da kaa, do musi
da safeh.  Safe di geba neten tobon pii.  Bu da safe, do da safe rahek e
du kabax fene "enyare."  Da safe enyare su kita nyarer e telo, paa, eta
lima.   Tu neten fidae Buru, do geba tama msian nax wahan do enyaret,
enyare utu, utu geran.  Jadi kalau umpama macaq geba dii da kaweq tu geba
sa nax ana mhuka la da reqa, do da reqa enyare rua pi telopii.  Eta moo,
poo da safe, da safe nax roko, da safe enyar rua, enyarex telo.  Pee tuu
geba dii riq bara hapu xnakax nax roko nax neten moo, bara keha xnakax
mooh, riq bara iko sabaraq nax roko nax neten moo, karna du sihix pii, paa
te rogoh moo dii.

Do fidae do eta ii ha na asu naa, asu naa do yako prepa fene eta geba di
ephaga nax neten eq naa, ri nax neten ha na ta, nake enyaerex na ta, pee
tuu nax roko nax sihit e di enyarex sahex dii, do da sihik pa geba sa
berani rogo moo.  Bu eta asu dii da eqax fafu di fikiqnaa, fi na ri nax
neten, paa da heka tuha gamdi nax roko nake enyarex di sihix dii, do da
hai rahek e, tu fidae do fene mansia nax fafu di moo, tu ha dii do asu nax
fafu di ta, jadi hai rahek e, tu hai la xmata fafu di rahek e.  Atau
wadun, do hai la xmata rahek e.

Pee tuu eta xmata sepu wadun atau fafu dii, asu dii musi esbalih.  Asu
dii, esbalih la bagau rahex epsue asu dii.  Bara esraa asu di fidi geba di
nake enyare sihix di mohe-mohe-mohe-mohe!  Moo do eta asu huda fidii,
berarti ka nam akal la ka putai nam roko nax sihit.  Tuu eta asu huda fidi
geba nax sihit e, berarti i ha dii do ka roko tuha asu.  Kae ada di banda
sihix lalen moo, kae ephaix nam asu moo, ka sbali nam asu moo.

Jadi exmata baa riqe ha di da baheka tuha fidi kita nani enyarex dii, paa
da rogo di nan roko nake enyaren di basihix dii rahek e.  Pee tu sbali asu
la ol tuhah.

Eta geba, do bara.  Eta moo, do ha di ya prepax dii fene geba di nake
kanwakex repo-repo pii, nax hatux di pii, do wapkaex, tuu da kaa geba di
ta.  Na man fafu, eta tonal, sapan, bara!  Bara eguh moo.  Moo do watik e
geba di ta!  Kalo macaq ha qina ya prepa fene fafu di fidi geb dikax nake
enyarex tem da rogo tuha di nake enyare bole.

Eta asu rogo tuha kita nani neten gamdi nan roko nax neten e, berarti asu
nax noro di ta.