MURA.

Kami fi dae, do gebaro kali warahe pii, du egu feten pii, du egu pala pii,
do fene, "Bara kaa peni la lalen emsian tem ma kaah."

Pee tuu ma bakali warahe dii, bu ma baprasa-prasa fen lale exnaax di moo,
eprasa-prasa tu du murah la m kaa mahede.  Ramax fene kali fodoro polrua
pi fodor poltelo pii, kali bage dua hawa di haix pii, epax la sepu hawa di
haix pii, teme ana mhanaro suba la du sida wae, pi du hapu unex pii, du
iko phaga pii, la dapak e fafu sa pii, hama tonal la dapax tonal pii, sida
wae la dapak e sehe pi wanax pii, teme oli suba dii, la du mura waraher
dii teme bisa la ma kaa waraher dii.  Pee tuu du oli dii, pee tuu du papu
waraher dii do walir telo pi walir paa pii.

Mura dii do cuma nake exnaan oli, pee tuu kita papu waraher dii tu ma
xmasak e tonal tu faforo tu wanato dii, pee tuu ramax tuu geba hawa tobon
dii, gam di bageaq ana mhana, da kaa warahe di saa, pee tuu da luak e (At
this point Yan makes a blowing sound). "Fuka mpeit e, olo mpeit e, nam
bahagiaq dii, tu  kam namiro naa la kam kaa."

Pee tuu du kaa gerano dii tu faforo tuu tonalo dii, pee tuu fuka mpeix sa
te doo sira tehux mohe.  Ramax tuu du kaa dii, pee tuu sira ftuha fene,
"Fuka mpeit e, olo mpeit e, penyakit e, nam bageaq di kam basubax di haix,
tu kam namiro naa la kam kaa."

Dii do biar fifin taun emsian baa, bu sira percaya fen ha dii bageaq e
fuka mpeix tu penyakix nake di ta haik e.  Pee tuu gerano dii paa sir
nunuro paa sir kaax.

Ha dii fen "murah."