SAGULIT.

Kami fi dae, do kam nami enmidit sa qaan "sagulit" e.  Do kami eptea, do
kam jaga siguli fene san saguli nake exdemen la nax roko kaba mtaix moo,
do da kala.  San saguli nake exdemen eta nax roko kabah exdemen e, do riq
menaq.

Do gam na kam sagulix lolikan naa, fene, "Fuan gam di warian, bu omon gam
di olot."  Do anato hama-hama-hama-hama, kabatage lolikan.  Lolikan fuan
an pao dii, do paqan gam di warian e, sedaqkan omon e ha dii do epax-epax
gam di olot.

Gam di pee tuu kam sagulik e kastela, fene, "Ku kaah, do ku rasa seqsara,
bu ku spelek e, ku musix, tu da gosa."  Dii fene kastela di ta.

Saa hede do niwe fuan.  Fene, "Ku latah gam aq naa, ku lata gaba-gaba.  Ku
latah eta dena aki, ku lata beta besi.  Ku lata eta ku dena aki, ku lata
sakik e nake ii box-boti saa.  Paa ku lata suba ax tifu, ii boti ku suba
aki, ku baaqak e masi sa bamsaikx."  Do fen niwe di ta.  Oko ha di
gaba-gaba dii.  Teme nax oko aki da bagiwe dii, i ha gam di besi.  Teme
isin aki.  Tem suba aki, masi di do fene ii ha dii nake waen dih.

Gam di pee tu kam sagulik e warahe fene, "Pestiik, pestaak!  Potria ma dae
lale."  Fene pesa gam aq naa, ku aqax dae, isin do moo pee.

Du sagulik e mesin ketiik fene, "Ma pebeh fi kiiq naa, sipu fi dae."  Fene
padahaal kita pebe fi kiq naa, riq tulis fi kiq dae.  Do fene mesin ketik
di ta.

Du sagulix palita fene, "Masi lae hetak e, fulan saka mata." Do fen minya
di sepuh pao, nake naan bu sepuh.

Du sagulix sakik e banit e fene, "Fat olo mkoti-mkotin, wa fuhan sa
banodo."  Do fene kita naa, do i ha gam di fat olon dih.  Pa wae sa fi na
kita na mohe-mohe.  Bu ku karaja-karajaa eta ku aqak e banito banodo, do
fen i ha dii do wa fuhan di ta.  Wa fuhan di fen banito dih.

Du sagulix sakik e subu fene, "Geb koix, geb dapet, rogo psiax fefa
msian."  Fene amkete pii, inkete pii, wali dawen pii, nax bela sa pii, bu
barogo baa na fefa msian, subu msian, nah e.  Do fene subu di ta.

Toqi du sagulik e capatu fene, "Geba msian kehax waga rua."