Meh menet do mehe na ta fi dae Buru do du eguh paa du puna obat ramuan sa qaan ephenet, la du pehenex ana fina soson la soson bara haa. Phenet, du egu omon paa du wahak, pa d maqi, pee tuu du eguh fi dii, paa du hama fua tu dalu tu apu, paa du kaa psiax tu nax karomo meh menet naa. Bu ana fina yaq nake umur fi di musun lima eta da keha fi di musun polo, eta ana fina dii riqe soson haix tem riqe ephenek, do gos-gosa moo do da bisa moo. Bu eta ana fina yaq soson suba mahede pee tu da pakek, do da bisa. Sira fene, "Bisa da keha, tu ana fina naa da salawar nake obax di mahede." Eta neten dii fene nax fua sa moo, nake dalu sa moo, nax apu sa moo, tu fen mehex kakun, do du paqix baah. Du egu fi dii paa du wahax baah, pee tuu du kokah baa di soson. Ana mhanaro nun suka ana fina soson bara haa moo. Bae ana fina si nun suka la sira roin-roin soson bara haa moo. Sira phenex dii la supaya da kaweq tem bisa soson haa. Sir nun mau fen anax roin-roin du bara sosono suba la bara ha-haax moo. Ramax fen eta geba haa ada teme soson haa fa dii. Fi dae du phenex naa nake sqoin do fene la ana fina mhuka do soson bara haa su-suek. Tu fi dae Buru eta ana fina mhuka eta soson haa do sira mgea. Sira mgeax nun rokoro, nun rokor fene, "Umh! Ana fina di tewa nax ubat an sa moo, pa soson heka, pa da batigo-tigo." Bu fina mhuka mama soson tigo-tigo moo, do sira fen, "Mox. Bole. Ana fina mhuka dii bole. Da batewa nax obat sa di ta." Pee tuu fi dae do eta ramax fene, "Ku huma xkema, la nam anax tem sosomo haa fa dii." Tu sir tewa fen kalo geba huma xkemat e, do pasti nax geba haax midix soson. Bu kalo geba huma xkemax moo, la ana fina mhuka la ka sosom haa, do sira fen, "Ah! Geba dii mes nax geba haa sa, fen sosona haa. Do da tewa ubax sa la da garu soson moo di ta." Jadi fi dae Buru do sir nun suka ana fina mhuka soson bahaa moo. Ana fina xkemax do bole, tu sir tewa fen nax geba haax ada, jadi nax geba haax bisa midix soson. Bu ana fina mhuka bara. Ha dii sira mgea. Fen da tewa ubax sa moo. Fi dae Buru do ana fina mhuka pii, pokoxnya nama ana fina yaq soson suba mehede pii soson suba haix pii soson bakfatux pii, asa bara soson dolak haik e, do du phaix fene da bara tabuk e mae moo. Fen ramax tu ana fina tabuk mae, do ramax tu soson rema pa soson basrako gamdi mae dih. Pee tuu fi dae do du phaix. Ana roin e du phaix fen, "Iqataq, bara tabux mae." Kalo ana fina kaweq haix pii, ana fina mtuax haix yaq soson haa haix, paa nax anax sa haix seq apa-apa, tu sira fen i ha dii do da tewa bisa tehux mohe. Eta ana fina mhuka pi anax roin, qaan fen ana fina mamba fatan nipik e da mamba molai ha-haat, ana fina fatan laga ha-haa, molae faato molae jaga ha-haax, du bajagax fen iqataq, da bara tabuk e ii na mae na. Iko toho kareman do biar e peih eta haan doo, da iko mtaix moo, bu da te tabux mae moox. Moo do sira fen ramax tu soson remax. Nun suka la ana fina mhuka la sosona haa moo. Tu ana fina mhuka eta soson haa, do sira fene ana fina an dii da bafora bu da tewa nax ien sa moo. Jadi fi dae na fina mhukar do sira bersaiq ptea tu fina mtuato la xnika ioro. Eta fi dae mama la puna la haax, do sira du siuk e baa ana fina di la da egu tabul pii. Du phaix ana fina di fene inyataq mele da bara iko epax ii na ta. Tu fene ana fina saa bal-balax, do fene da iko epax ii na ta, da tabux mae, pee tuu nax anat e riq soson rema. Pee tuu nax anax fi ax pamori aki nah, da baba pelkakuk e, paa ana fina di waku soson fi dii, pa d fikeh pa ax mori aki, pa ana fina di soso fi aki pamori aki. Paa ana fina soso sepu fi pamori naa, poo da fikeh fi dii, paa da baweri sakix na pupan lalen nah. Lalen sa mahede, poo da masak e wa potot e, papu wa potox, poo nax anax basoso fi aki pamori aki, poo geda mahede, paa sementara da gomo nax anat e lapaas nax soso. Da salgae nax ina soson oli fi dii, paa da ba-satu-kali eksefux pao wae potox gas-gasix pao. Pee tuu ana fina di mata. Pee tuu endohin i ha naa, geb Buroro baeta-etax endohin dii eta skaraq, pee tuu sira mtako la ana fina soson haa pi soson rema pii, kalo ana fina mhuka.